E kuqja është tendenca këtë vit në Festivalin e Kanës dhe jo vetëm në tapetin e kuq. Shumë filma me vampirë dhe kanibalë të tjerë i sjellin freski zhanrit që përkon me origjinat e kinemasë.
Organizatorët e Festivalite kishin parashikuar që me shpalljen e seleksionimeve se në menu të këtij edicioni të 69-të do të kishte gjakpirës dhe kanibalë.
Në fakt ata janë të pranishëm me rreth 12 filma me metrazh të gjatë, të ndarë në seksione të ndryshme, “Neon Demon” i danezit Nicolas Winding Refn, “The Transfiguration” i amerikanit Michael O’Shea apo “Grave” i francezes Julia Ducournau.
“Me sa duket vitet e fundit Kana ka filluar të interesohet për filmat e horrorit, pa dyshim sepse ky zhanër tërheq kineastë prestigjozë si Jim Jarmusch”, shpjegon Jean Marigny, autor i “Vampires: de la légende au mythe moderne” (Vampirët: nga legjenda në mitet moderne).
Kineasti Jim Jarmusch që garon këtë vit me “Paterson” ishte gjithashtu para tre vitesh në Kanë me “Only Lovers Left Alive”, një film me vampirë me një ambient vizual dhe sonor të mirë punuar.
Të shfaqur rreth viteve 1920, filmat me vampirë dhe kanibalë kanë njohur suksese të ndryshme.
Madje disa prej tyre kanë shënuar historinë e kinemasë. Nga “Nosferatu” në vitin 1922, duke kaluar nga tregimet me “Dracula” të mishëruara nga Christopher Lee në vitet 1950, deri tek “The Fearless Vampire Killers” i Roman Polanski në vitin 1967, “Dracula” i F. F. Coppola (1992) dhe “Interview with the Vampire” i Neil Jordan (1994). (javanews.al / r.a)
