Kampioni i botës Valdet Gashi dyshohet se është vrarë në Siri nga udhëheqja e “Shtetit Islamik” pasi synonte të lironte disa robër të pakicës fetare jezide.
Dy ekspertë që po merren me çeshtjen kanë thënë për “20minuten” e Gashi po përpiqej për lirimin e robërve dhe ishte motivuar nga një citat i profetit Muhamed.
Gashi është rritur në Gjermani, ka bërë karrierë si taiboskier, është bërë kampion botëror në këtë lloj sporti, ka hapur në qytetin Ëinterthur të Zvicrës një qendër trajnimi për taiboks.
Gazeta zvicerane “20minuten” shkruan se një ndër arsyet e vrasjes së Valdet Gashit mund të jetë përpjekja e tij për të liruar disa robër të komunitetit fetar jezid, të cilët “Shteti Islamik” i trajton si armiq dhe i terrorizon mizorisht.
Tobias Huch, politikan i Partisë Liberale të Gjermanisë (FDP) dhe themelues i organizatës “Ndihma liberale për refugjatë” ka deklaruar: “Deri një ditë para vdekjes së Gashit kam mbajtur kontakt personal me të. Qëllimi ishte që të lirohen gratë dhe fëmijët”.
Pak a shumë të njëjtin mendim e përfaqëson edhe Samuel Althof, ekspert i ekstremizmit nga Baseli. Gashi e kishte njoftuar Althofin për idenë e tij për të liruar robër. Tri gjëra i synonte Gashi: së pari lirimin e jezidëve, së dyti shitjen e tyre palës kurde dhe sigurimin e një shume të parave, të cilat ai do t’ia jepte «Kalifatit» të «IS», së treti ai do të shihej në opinion si çlirimtar dhe jo si terrorist.
