Franca po përjeton një valë historike të nxehti, ku temperaturat kanë arritur deri në 44 gradë Celsius, duke shkaktuar të paktën 45 viktima, kryesisht nga mbytjet e të rinjve nëpër lumenj e liqene.
Alarmi i kuq ka përfshirë 58 departamente, teksa mbi 68 mijë shtëpi kanë mbetur pa energji elektrike në Finistère për shkak të dëmtimit të një transformatori nga nxehtësia.
Përveç mbylljes së shkollave, masat ekstreme kanë prekur edhe turizmin; vizitorët në Paris janë ankuar për mbylljen e parakohshme të Kullës ikonike Eiffel për të shmangur urgjencat shëndetësore.
Situata është alarmante në mbarë Europën, çka ka detyruar shtetet dhe qytetarët të përshtaten në mënyra të pazakonta. Në Londër, njerëzit po vërshojnë drejt kanaleve lundruese të qytetit për t’u freskuar, vende këto ku zhytja dhe noti nuk praktikohen pothuajse kurrë në kushte normale.
Në Barcelonë, asistentët po përdorin karrige amfibe për të ndihmuar personat me aftësi të kufizuara të futen në det. Ndërsa në Gjenevë të Zvicrës, të moshuarve po u ofrohen kinema falas gjatë ditës në salla të kondicionuara, si një strehë e sigurt për t’i shpëtuar temperaturave përvëluese të jashtme.
