Një numër i madh i vendeve më të varfra që marrin vaksina Covid-19 përmes skemës globale COVAX nuk kanë doza të mjaftueshme për të vazhduar programin e imunizimit. Lajmin e ka bërë të ditur Organizata Botërore e Shëndetësisë e cila ngre alarmin pasi shumë njerëz rrezikojnë të mos vaksinohen. Këshilltari i lartë i OBSH-së Bruce Aylward ka bërë të ditur se programi Covax kishte shpërndarë 90 milion doza në 131 vende.
Mungesat vijnë ndërsa disa kombe në Afrikë shohin një valë të tretë të infeksioneve. Presidenti i Afrikës së Jugut Cyril Ramaphosa bëri thirrje për t’i dhënë fund grumbullimit të vaksinave nga vendet më të pasura ndërsa qeveria e tij po përpiqej të frenonte një rritje të rasteve. Në një nivel kontinental, vetëm 40 milion doza janë administruar deri më tani në Afrikë më pak se 2% e popullsisë janë vaksinuar.
Të udhëhequr nga OBSH dhe organizata të tjera ndërkombëtare, Covax vendosi fillimisht një objektiv për të siguruar dy miliardë doza në të gjithë botën deri në fund të 2021. Shumica e tyre po dhurohen në vendet e varfra, ku Covax shpreson të shpërndajë mjaft vaksina për të mbrojtur të paktën 20% të popullsisë. Sidoqoftë, shpërndarja e këtyre vaksinave është penguar nga vonesat në prodhim dhe ndërprerjet e furnizimit, duke çuar në mungesa në vendet që varen plotësisht nga Covax.
Uganda, Zimbabve, Bangladeshi dhe Trinidad dhe Tobago janë vetëm disa nga vendet që kanë raportuar mungesë vaksinash në ditët e fundit. Nga 80 vendet me të ardhura të ulëta të përfshira në Covax, të paktën gjysma e tyre nuk kanë vaksina të mjaftueshme. Disa ekspertë shëndetësorë besojnë se mund të kalojnë muaj nëse jo vite para se të vaksinohen mjaft njerëz në të gjithë botën për të deklaruar fundin e pandemisë.
/a.r
