Alketa Kajtazi, motra e madhe e Orialdës dhe e Klevisës, të larguara nga shtëpia prej 15 korrikut, dyshon se ato janë manipuluar nga ndonjë person tjetër.
Në një prononcim për gazetën “Panorama”, ajo tregon se kohët e fundit dy motrat e saj qëndronin të diferencuara nga familja, duke lënë përshtypjen se po organizonin diçka. Ajo shprehet se motrat nuk e kishin vënë në dijeni për ndonjë njohje të re të kohëve të fundit, ndërsa i ka bërë përshtypje fakti se garderoba e tyre ishte pasuruar së fundi me rroba të reja, të blera nga persona jashtë familjes.
“Orialda dhe Klevisa qëndronin të distancuara nga pjesa tjetër e familjes. Nëse ne qëndronim në sallon, ato shkonin dhe rrinin të dyja te dhoma tjetër dhe e mbanin derën mbyllur. Si duket flisnin me ndonjë në rrjetet sociale. Unë i kam qëndruar shumë pranë, kur u nda nga ishi fejuari, Olës (Orialda)”, u shpreh vajza e madhe e familjes Kajtazi.
Ajo rrëfen dyshimet e saj në lidhje me largimin në mënyrë misterioze prej 25 ditësh të dy motrave.
