Vajza shqiptare, e vrarë rreth 19 vjet më parë në qendër të Amsterdamit, në Holandë, e paidentifikuar, dyshohet të jetë nga Kamza.
Në kërkesën e parë për ndihmë nga gazetarët shqiptarë, por edhe nga qytetarët këtu, gazetarët holandezë që ishin vënë në kërkim të familjes së vajzës së vrarë në Amsterdam, flisnin me siguri që ajo mund të ishte nga Elbasani.
Kjo për shkak të disa dëshmive që ata kishin mbledhur në Holandë. Dëshmia më e fortë ishte e një vajzë që punonte në një bar në Amsterdam, me të cilën viktima kishte folur 3 ditë para se të gjendej e vrarë në rrugë.
“Kemi disa të dhëna se ajo mund të jetë nga Elbasani, pasi një tjetër vajzë që punonte në një bar në Amsterdam kishte folur tri ditë përpara se ajo të vritej dhe kishte thënë se ishte nga Elbasani”, u shpreh dje gazetari holandez.
Nga ana tjetër, ekziston edhe një mundësi e dytë, që familja e saj të jetë në Kamzë. Për këtë nuk ka ndonjë dëshmi, apo diçka konkrete nga ana e gazetarëve holandezë, por sipas tyre ka të dhëna që mund të jetë andej.
“Dyshohet gjithashtu se ajo mund të jetë vajza e një familjeje nga Kamza. Të afërmve u janë marrë analiza për t’i krahasuar me DNA–në e saj. Dy tatuazhe, njëri në krahun e majtë dhe tjetri në krahun e djathtë, janë dy prej shenjave dalluese të viktimës”, tha dje gazetari i huaj.
Pas ndihmës që ata u kërkuan kolegëve të TV Klan, mësohet se do t’i drejtohen për ndihmë edhe Policisë së Shtetit, në mënyrë që të nisë një verifikim për zbulimin e identitetit të saj, në rast se ajo mund të jetë në listën e personave të humbur, apo të skeduar më parë.
