Vajza e Che Guevarës refuzon meshën e Papa Françeskut
Vajza e revolucionarit të famshëm, Che Guevara, ka refuzuar të shkojë në meshën që Papa Françesku do të mbajë në sheshin kryesor të Havanës.
Aleida Guevara thotë se Partia Komuniste e Kubës u ka bërë thirrje njerëzve të marrin pjesë në meshën e Papës, por ajo nuk është dakord me këtë. Ajo i ka thënë agjencisë së lajmeve AFP se pjesëmarrja e saj në këtë meshë do të ishte një hipokrizi. “Nuk do të shkoj në meshë sepse për mua do të ishte hipokrizi. Çfarë do të bëj unë atje për orë të tëra? Babai im është atje sepse është simboli i këtij vendi (varri i Che Guevarës ndodhet në Sheshin e Revolucionit, aty ku mbahet mesha e Papa Françeskut).
Papa mbërriti në kryeqytetin kuban të shtunën dhe u prit fillimisht nga presidenti Raul Kastro. Ndërkohë sot, ai ka zhvilluar një takim edhe me liderin historik kuban, Fidel Kastro. Partia Komuniste dhe Kisha Katolike kubane u kanë bërë thirrje njerëzve të bëhen pjesë e meshës historike, e para në tri të tilla që do të mbajë Papa në Kubë. Udhëtimi 10-ditor i Papës, pas Kubës përfshin edhe një vizitë në SHBA. Papa kohët e fundit ka bërë rolin e mediatorit mes Uashingtonit dhe Havanës dhe është parë si garant për negociata mes dy vendeve.
