Pas njohjes së masës së sigurisë ”Arrest me burg” për Martina Pajollarin dhënë sot nga Gjykata e Korçës ka ardhur edhe reagimi i avokatit të kushërinjve Valter e Edlir Mollaj, Nevzat Tarelli, i cili ka kërkuar pranë Gjykatës sigurimin e dëshmisë së 18-vjeçares.
Sipas avokatit, 18-vjeçarja nga fshati Marjan ka dëshmi kontradiktore që përplasen me njëra-tjetrën. Këto dëshmi sipas avokatit mund të kenë ardhur edhe nga influencime të ndryshme.
Duke lënë për të kuptuar se dëshmitë që përplasen me njëra-tjetrën nuk e ndihmojnë hetimin e çështjes për këtë arsye avokati i kushërinjve Mollaj ka kërkuar sigurimin e dëshmisë së vajzës, e cila për policinë akuzohet për veprën penale “Vrasja me paramendim”, kryer në bashkëpunim, si e implikuar në ngjarje.
Pyetje: Sapo thatë që ka ndikime të tjera, për çfarë ndikimesh flisni?
Nevzat Tarelli: Flas për mënyrën si gjenden në dosje dëshmi të cilat çuditërisht kanë një rrjedhë jo normale. Nëse në fillim është hedhur një pistë nga vetë Martina dhe jepet një internal lëvizjeje, jepet një pistë tjetër, në momentin që kjo pistë është verifikuar dhe nuk ka rezultuar asgjë konkrete këtë e them nga provat që ka dosja, atëherë vajza ndërron një pistë tjetër. Pas marrjes së dëshmisë së vajzës arrihet t’i merret po bariut i cili ndodhet i arrestuar, e njëjta pistë e dytë. Kjo flet shumë për një hetim. Nuk ka mundësi që dy persona të ndryshëm që japin një herë një variant të gënjeshtërt përsëri të përsërisin një gënjeshtër tjetër, por në një version të ri.
Pyetje: Po thua që u është diktuar kjo gjë?
Nevzat Tarelli: Këtë nuk mund ta konfirmoj që u është diktuar, por unë them që është e influencuar. Se nga kush, kjo ngelet për t’u parë. Kjo ka qenë shkaku që unë kam kërkuar sigurimin e provës në mënyrë që nesër vajza mund të jepte një version tjetër apo mund të zhdukej si në rastet e tjera që kam pasur që kanë dhënë dëshmi të cilat logjikisht nuk janë konfirmuar dhe më pas personi që ka dhënë atë dëshmi fajësuese nuk është gjendur më. Kjo më ka bërë që të veproj në këtë mënyrë. Më vjen keq që nëse kërkesa ime do të jetë bërë shkak për arrestimin e vajzës për këto motive. Unë dyshoj në këtë pjesë.
Pyetje: Vajza a është pjesë e kësaj vrasjeje?
Nevzat Tarelli: Nuk mund ta them, por mua më krijon përshtypjen që vajza diçka di. Nga komunikimet që janë ose nga mënyra se si serviret ngjarja unë dyshoj që vajza diçka di, por unë nuk besoj kurrë që vajza është pjesë e marrjes pjesë në krim, të paktën nga këto të dhëna të deritanishme. Jeni gazetarë dhe keni marrë intervista të vajzës. Nëse shohim me kujdes dëshminë e parë, deklarimin e parë të servirur nga vajza. Me deklarimin e dytë të vajzës kanë ndryshime thelbësore, të cilat në mënyrë po nga e njëjta vajzë, në mënyrë të lirë para mediave janë hedhur poshtë dhe thotë që mua më janë diktuar. Kjo ka qenë arsyeja që kam kërkuar sigurimin e provës. Pra le të sigurohet në gjykatë dëshmia e saj sepse jashtë mund të jetë objekt i ndikimeve dhe influencave nga më të çuditshme. Nuk po them as presion. Nuk e them dot këtë sepse nuk e kam informacion. Ama mënyra si një njeri servir versione të ndryshme, njëherë një version, njëherë një tjetër dhe para mediave, të bën logjikshëm të kuptosh se ajo minimalisht ose fsheh, ose është në influencën e personave të tjerë. Për të eliminuar këtë situatë dhe për të shkuar tek një hetim korrekt, për të zbardhur realisht të vërtetën dhe jo për të thënë që gjetëm një autor tani dhe hajde të merremi për t’i gjetur provat e tij, unë nuk i përkas këtij formimi.
/a.r
