Uzbekistani organizoi sot ceremoninë e varrimit për presidentin Islam Karimov, i cili vdiq në moshën 78-vjeçare për shkak të një hemoragjie cerebrale, pasi drejtoi me dorë të hekurt për më shumë se 25 vite shtetin me popullsinë më të madhe në Azinë Qendrore, duke anashkaluar kritikat e Perëndimit.
Kjo është ceremonia funebre e presidentit të parë e të vetëm të Uzbekistanit të pavarur, i vlerësuar për garantimin e stabilitetit në këtë shtet të besimit mysliman në kufi me Afganistanin, por i akuzuar nga kundërshtarët e tij për shkelje të rëndë të të drejtave të Njeriut.
Lamtumira e fundit do të mbahet në qytetin e tij të lindjes në Samarcande, me rëndësi historike në ”Rrugën e Mëndafshit”.
Autoritetet e ish-republikës sovjetike dekretuan tre ditë zi kombëtare duke nisur nga sot.
Me ndërprerjen e përkohshme të programeve me muzikë tradicionale, televizioni kombëtar transmetoi mëngjesin e sotëm pamje nga turma e grumbulluar në të gjithë rrugët lidhëse të kryeqytetit Tashkent, që shoqëroi kortezhin ndërsa po transportonte trupin e presidentit.
Forca të Ushtrisë shoqëruan arkivolin në një avion që do të vijonte rrugën drejt Samarcande, në jug të vendit.
Në qytetin e lindjes së kreut të shtetit, shtetas të shumtë uzbek mbanin kapele tradicionale në ngjyrë të zezë qëndisur me fill të bardhë morën pjesë në kortezh, që sapo kishte mbërritur por pak nga të pranishmit në shesh mund të kishin akses në vendin e varrimit.
Në mesin e të ftuarve zyrtarë dallohej kryeministri rus, Dmitri Medvedev, presidenti i Taxhikistanit, Emomali Rahmon si dhe kryeministri kazak Karim Maksimov./ r.a
