Ushtrimet me pesha, sidomos në rastet kur trupi juaj nuk është i mësuar për të ngritur pesha, i dëmtojnë indet muskulore për një kohë të shkurtër dhe në të njëjtën kohë i stimulojnë ato grupe të muskujve që të riparohen dhe të bëhen më të forta.
Në një studim të publikuar në vitin 1997 nga Universiteti McMaster në Kanada, u vërtetua se gjatë tri orëve të para të ushtrimeve me pesha, me intensitet të lartë, si tek fermrat ashtu edhe tek meshkujt, vlerat e dëmtimit muskulor rriten në mënyrë domethënëse dhe këto vlera qëndruan të tilla për 24 orët në vijim.
Në të njëjtën kohë, parametra të tjerë të cilët kanë të bëjnë me riparimin muskulor rriten po ashtu dhe këta parametra janë prezent për të paktën 48 orë pas ushtrimeve.
Këto të dhëna, të cilat janë riprodhuar edhe shumë herë të tjera pas asaj kohe, tregojnë se muskujt kanë nevojë për një ose dy ditë pushim në mes të seancave trajnuese në mënyrë që cikli i riparimit të përmbushet plotësisht, shkruan Express. Jo vetëm muskujt dëmtohen gjatë ushtrimeve me pesha. Gjatë një seance të tillë edhe llojet tjera të indeve të buta siç janë ligamentet dhe tendinat pësojnë dëmtime. Në fakt, nyjet janë shumë më të ndikuara nga ushtrimet me pesha sesa vet muskujt.
Sa i përket sportistëve të cilët janë të mësuar të ngrisin pesha në baza ditore, ata ndërkohë zhvillojnë një tolerancë ndaj peshave të cilat ata i ngrisin rregullisht. Për më tepër, edhe pse janë të mësuar më këtë intensitet të peshave, shpesh ndodh që ta lëndojnë shpinën, kyçet e duarve apo nyje të tjera si pasojë e mbingarkesës.
Mënyra e duhur është të prisni të paktën 48 orë në mes të seancave stërvitore me pesha të cilat kanë si qëllim ngacmimin e grupeve të mëdha muskulore (p.sh. shpina, këmbët etj.). Në momentin që e keni arritur adaptimin neuromuskulor, ndani grupet e muskujve dhe lejoni që koha e rikuperimit të jetë e mjaftueshme. Javanews/ a.k
