Zyrtarët ushtarakë të Gabonit e kanë nisur një përpjekje për grusht shtet duke e zaptuar radion shtetërore dhe duke deklaruar pakënaqësi ndaj presidentit Ali Bongo, i cili është duke u trajtuar nga një sulm në zemër në Marok.
Kelly Ondo Obiang, njëri nga udhëheqësit ushtarakë, tha se fjalimi i fundit i presidentit i ka përforcuar dyshimet për kryerjen e punëve që nuk i përkasin presidentit. Në një video që po qarkullon nëpër rrjetet sociale, ai shihet i veshur në uniformë duke dhënë deklaratë në studion e radios shtetërore. Prapa tij shihen dy ushtarë të armatosur me armë të gjata.
Udhëheqësi ushtarak tha se puçi po organizohet për ta rikthyer demokracinë dhe për t’i përzënë ata që i kanë vrarë qytetarët më 31 gusht të vitit 2016. Vrasja e tyre kishte ndodhur gjatë dhunës që kishte shpërthyer pas zgjedhjes së presidentit në detyrë nga një proces i kontestuar zgjedhor.
Një burim i afërt me qeverinë ka njoftuar se ka pasur të shtëna me armë zjarri afër ndërtesës së televizionit kombëtar, por duket se puçit deri tash i janë bashkuar një numër i vogël i ushtarëve. Presidenti 59-vjeçar ishte shtrirë në një spital të Arabisë Saudite në tetorin e kaluar pasi kishte pësuar sulm në zemër, ndërsa aktualisht ndodhet për trajtim në Marok, shkruan “The Guardian”./a.meta
