Luftëtarit të Ushtrisë Çlrimtare të Kosovës, Artan Manit, nga Tropoja po i mohohet e drejta e azilit në Kosovë. Kështu thotë Mani për Gazetën NewBorn, i cili tash gjendet edhe në listat e veteranëve të po kësaj Ushtrie, apo më mirë të themi, i është shpërblyer lufta e tij që ka bërë në Kosovë, nga komandantët e tij. Artan Mani, ka disa vjet që kërkon azil në Kosovë, konkretisht në Qendren e Azilantëve në Lipjan, por një kërkesë e tillë i është mohuar vazhdimisht. “Unë kam bërë kërkesë në Magure, ku është Qendra e Azilantëve, ku këtu e kam bashkëshorten me tre djemt e mi. Unë i kam dy hasmëri në Shqipëri, ndërsa më vjen shkresa nga zyrat e migracionit të Kosovës dhe refuzimi me arsyen se jeta ime nuk është e rrezikuar në Shqipëri”, thotë Mani për Gazetën NewBorn. Në fund, Mani tha se do të iu drejtohet edhe organeve më të larta shtetërore, duke mos u pajtuar me refuzimin e kësaj kërkese për azil.
