Autoriteti i Kontrollit Ushqimor, (AKU) në prag të festës së ndërrimit të viteve, që shoqërohet me rritje të konsumit, ka forcuar inspektimet në tregjet e vendit për sigurinë ushqimore.
Sipas AKU-së, gjatë inspektimeve të kryera dy javët e fundit, janë sekuestruar produkte ushqimore me datë skandece të kaluar dhe mish apo mjaltë pa dokumente shoqëruese.
Siguria ushqimore për periudhën e fundvitit, kur rritet ndjeshëm konsumi, ka vënë në lëvizje Bashkinë e Lezhës.
Në bashkëpunim me Autoritetin Kombëtar të Ushqimit prej ditësh po kryhen kontrolle në terren tek tregtarët ambulantë.
Inspektorët shprehen se, produktet e pa shoqëruara me faturë origjine, sekuestrohen. Ndërsa i bëjnë apel qytetarëve të jenë sa më të vëmendshëm dhe të bëjnë blerje për fundvit dhe gjatë vitit në subjekte të lincensuara siç janë marketet dhe supermarketet, ku ushqimet janë më të kontrolluara.
Sipas AKU-së, në Fier, janë kryer mbi 160 kontrolle në subjekte tregtare të ndryshme ndërsa janë vendosur mbi 70 gjoba me vlerë 7,2 milionë lekë të reja, ndërkohë që në njësitë e tregtimit të mishit është konfiskuar dhe asgjësuar mbi 220 kg mish jashtë standardit.
Ndërsa në Vlorë aksioni i AKU-t, në bashkëpunim me Drejtorinë Rajonale të Tatimeve Vlorë si dhe Krimin Ekonomik u përqendrua në aksin rrugor Llogora- Himarë, ndërsa janë proçeduar 3 persona pasi tregtonin mjalt dhe mish të pashoqëruar me dokumentacion dhe pa plotësuar kushtet higjeno-sanitare të produkteve ushqimore.
