Ka një ligj për femrat që presin të bëhen nëna apo për ato nëna që kanë ende foshnjet në gji. Në ligj parashikohet edhe ushqyerja e fëmijëve me produkte zëvendësuese, për të cilat janë ashpërsuar disa kritere në mënyrën e tregtimit apo dhe prodhimit.
Por qeveria shqiptare, ka vendosur që nëpërmjet një projektligji të veçantë të ndryshojë ligjin aktual, me qëllim që të nxisë dhe të mbrojë të ushqyerit me gji, si dhe të rregullojë tregtimin e zëvendësuesve të qumështit të gjirit për të ushqyerit e shëndetshëm të fëmijëve. Sipas ligjit me termin “ushqim plotësues” kuptohet çdo ushqim i përshtatshëm, i paraqitur për ushqim shtesë të qumështit të gjirit, formula për foshnja ose formula pasuese.
“Prodhuesit dhe shpërndarësit e produkteve të caktuara nuk lejohen të prodhojnë ose të shpërndajnë materiale informative ose edukative për ushqyerjen e foshnjës dhe fëmijës, përfshirë edhe informacionet që i adresohen publikut të gjerë. Elementet kryesorë të përmbajtjes së materialeve edukative dhe informuese për ushqyerjen e foshnjës dhe fëmijës, përfshirë informacionet që i adresohen publikut të gjerë, miratohen me urdhër të ministrit përgjegjës për shëndetësinë”, thuhet në propozimet e qeverisë. Ndërkohë që ligji aktual, përcakton se “drejtuesit e qendrave shëndetësore dhe autoritetet shëndetësore, vendore dhe kombëtare, duhet të nxisin, të mbështesin dhe të mbrojnë, në kuptim të këtij ligji, të ushqyerit me gji dhe të bëjnë publike mangësitë e mëdha që krijojnë të ushqyerit alternativ”.