Asnjë ministër, zëvendësministër, drejtor apo kryebashkiak nuk do të mund të lëvizë jashtë vendit pa lejen e kryeministrit Edi Rama. Shefi i qeverisë ka vendosur të disiplinojë me ligj lëvizjet e zyrtarëve më të lartë të shtetit duke firmosur një urdhër të botuar në Fletoren Zyrtare, dhe që hyn në fuqi menjëherë. Vendimi rregullon veprimtarinë e kupolës drejtuese të shtetit dhe administratës shtetërore në raport me jasht, duke u ndaluar ministrave, drejtorëve, zëvendësministrave dhe kryebashkiakëve të bëjnë deklarata, të mbajnë qëndrime dhe të negociojnë për çështje të ndryshme jashtë shtetit pa u konsultuar më parë me ministrin e Jashtëm, Ditmir Bushatin.
Kjo nënkupton se çdo lëvizje për çështje të rëndësishme dhe çdo deklaratë e bërë jashtë shtetit, duke të konsultohet më parë me Ditmir Bushatin.
“Ministrat e zëvendësministrat, drejtuesit e institucioneve qendrore në varësi të kryeministrit e të ministrave, drejtuesit e institucioneve të tjera të administratës shtetërore dhe të organeve të pushtetit vendor, në deklaratat verbale e të shkruara dhe intervistat për probleme të rëndësishme të marrëdhënieve me jashtë duhet të jenë në përputhje me programin e qeverisë për politikën e jashtme të Republikës së Shqipërisë. Për çështje të politikës së jashtme të një rëndësie të veçantë, funksionarët e lartpërmendur, në deklarimet e tyre publike, duhet të konsultohen, paraprakisht, me Ministrinë e Punëve të Jashtme”, thuhet në vendim.
