Partia Demokratike, përmes deputeti Oerd Bylukbashi u shpreh se ish- rektori i Universitetit të Tiranës, Dhori Kule dhe ai aktual Mynyr Koni kanë bërë takime informale me kryeministrin Edi Rama dhe me ministrin Saimir Tahiri, ku e njoftuan mbi kërcënimin që kishin marrë nga Emiljano Shullazi.
Por pas deklaratës së PD-së, reagoi Universiteti i Tiranës, i cili në një deklaratë të shpërndarë për mediat, hedh poshtë këtë pretendim.
Universiteti i Tiranës thekson se takimet e rektorit në detyrë Dhori Kule dhe atij aktual Mynyr Koni kanë qenë zyrtare dhe se ministrat përkatës kanë marrë përgjegjësitë institucionale për kërcënimet e bëra nga Shullazi.
“Sqarim lidhur me lajmin e shpërndarë në disa media mbi takimin e zhvilluar me Ministrin e Brendshëm, Ministren e Arsimit dhe drejtuesit e Policisë së Shtetit me rektorin e Universitetit të Tiranës dhe dekanin e Fakultetit të Shkencave të Natyrës, kandidatin për rektor Mynyr Koni:
Në takimin zyrtar që rektori i UT-së dhe kandidati për rektor ka zhvilluar me Ministrin e Brendshëm, Ministren e Arsimit dhe drejtuesit e lartë të Policisë së Shtetit, ju informojmë se ky takim ka qenë zyrtar dhe rruga e zgjedhur për t’u përballur me problematikën e shfaqur gjatë procesit zgjedhor në UT ka qenë vetëm ajo zyrtare.
Institucionet e përfaqësuara në këtë takim kanë marrë përsipër përgjegjësitë e tyre institucionale”, thuhet në deklaratë.
