Mesnatën e 3 Gushtit u mbyllën aplikimet në unviersitet. Pjesë e garës janë bërë 21 mijë maturantë duke pësuar një ulje nga vitet e shkuara.
Sipas të dhënave të rrjetit akademik shqiptar i cili ka në adminsitrim portalin U-Albania ku aplikojnë maturantët, për vitin akademik 2022-2023 në krahasim me vitin e shkuar kanë aplikuar rreth 2 mijë maturantë më pak duke pësuar një ulje me 8.7%.
Duke mos qenë të fokusuar në një degë, maturantët në 90% të rasteve kanë plotësuar 10 preferenca në formularin A2 ku duan të ndjekin arsimin e lartë. Shumica e të rinjve kanë zgjedhur degë që ofrojnë mundësi punësimi jo vetëm në tregun vendas, por kryesisht atë jashtë vendit siç janë programet e Shkencave Informatike, degët e Mjekësisë dhe Infermierisë si dhe degët e Inxhinierisë. Rreth 50% e aplikimeve janë bërë kryesisht në këto fusha studimi.
Vihet re një tendencë në rritje e aplikimeve edhe e degëve që janë shpallur si degë prioritare në universitetet publike. Por edhe ulja e mesatares në disa degë nga 7.5 në 6.5 ka bërë të shtohet numri i maturantëve që i kanë përzgjedhur siç është Mësuesia të cilën e kanë përzgjedhur 8.8% . Në rritje është edhe numri i maturantëve që kanë aplikuar për degët me karakter profesional, me rreth 8.1%.
Fituesit do të shpallen nga universitetet brenda datës 31 Gusht. Aplikantët që kanë pakënaqësi nga shpallja e rezultateve më 1 Shtator mund të bëjnë ankimim pranë fakulteteve përkatëse, ndërkohë që faza e parë e regjistrimit është në datat 2-15 Shtator 2022.
Në portalin U-Albania, maturantët mund të gjejnë notat e provimeve të maturës, kuotat e universiteteve por edhe renditjen e fituesve të vitit të shkuar për të bërë një vlerësim se ku ata mund të fitojnë.
/a.r
