Tashmë që publikimi i listave fituese për studimet universitare janë shumë pranë publikimit të tyre, edhe stresi në maturantët në vend, të cilët kanë aplikuar për të vazhduar studimet e tyre është shtuar.
Ndërkohë dekani i Fakultetit të Ekonomisë, Dhori Kule, nëpërmjet një deklarate për mediat, ka zbuluar se dy nga degët më të kërkuara nga studentët janë Administrimi i Biznesit dhe Fakulteti i Drejtësisë.
Sipas Kules, nëse në Fakultetin e Ekonomisë do të regjistroheshin të gjithë fituesit të fazës së parë, do të mbeteshin rreth 400 kuota të lira. Ai gjithashtu ka bërë thirrje që maturantët që janë në pritje të mos shqetësohen pasi pas datës 29 ka një procedurë me 7 seanca 48- orëshe, ku do tu jepet një mundësi studentëve të cilët janë në pritje për të tu regjistruar në Fakultetin e Ekonomisë.
Gjithashtu dekani i Ekonomisë shtoi se Fakulteti i Ekonomisë do të jetë në dispozicion të studentëve gjatë gjithë kohës së regjistrimeve, në mënyrë që tu ofrojë atyre mbështetje maksimale.
Ndërkohë Artan Hoxha, dekani i Fakulteti të Drejtësisë, është shprehur se ndodhemi në një moment të veçantë për të gjithë studentët që kanë dëshirë të vazhdojnë studimet në Universitet.
“Ne kemi më shumë kuota pasi sipas ligjit të ri të arsimit, studimet në drejtësi janë 5- vjeçare. Për këtë shkak ne kemi një numër të madh studentësh krahasuar me vitet e mëparshme.
Në përfunduam verifikimet dhe në faqen tonë, ashtu si kërkon udhëzimi i Ministrisë për disa minuta do të jenë të afishuara listat. Studentët mund të gjejnë të gjithë pikëzimin”, është shprehur Hoxha.
Dekani i Fakultetit të Drejtësisë ka deklaruar se këtë vit Fakulteti i Drejtësisë do të ketë studentë shumë të mirë, pasi edhe vetë studentët që kanë aplikuar janë shumë të mirë.
Gjithashtu Hoxha ka folur edhe për studentët të cilët mbeten në pritje pas publikimit të listës së fituesve, duke thënë se nëse këtë vit do të regjistrohen 400 studentë të listës së fituesve do të mbeten rreth 350 kuota, të cilat duhen të plotësohen brenda raundit të parë
a.ç
