Aplikimi për të fituar të drejtën e studimit në një nga programet që ofrohen nga 34 institucionet e arsimit të lartë publik dhe privat, do të fillojë në fund të muajit korrik. Për herë të parë pjesë e aplikimit veç 12 universitete publike do të bëhen edhe 22 universitet private. Maturantët këtë vit do të aplikojnë nëpërmjet formularit të aplikimit, ku do të kenë të drejtën të regjistrohen në 10 programe studimi. Ndryshe nga formulari 2, ku kishte shumë rëndësi renditja e preferencave, në këtë formular renditja e 10 degëve që preferon kandidati nuk kanë rëndësi.
Sipas zv.ministres së Arsimit, Nora Malaj, draftudhëzimi është dërguar për diskutim në institucionet e arsimit të lartë dhe më pas të miratohet. Në lidhje me kuotat, ajo ka sqaruar se “kuotat e miratuara nga senatet e universiteteve janë përfundimtare, nuk do miratohen më nga qeveria”.
APLIKIMI ONLINE
Sipas zv.ministres, Nora Malaj, afati i aplikimit në universitet u shty për në fund të muajit korrik, për shkak të disa problemeve teknike që kanë ardhur nga sekretimi i provimeve të maturës, pasi në disa raste nuk është përputhur kodi me emrin e maturantit si dhe hedhja në sistem e të dhënave dhe të maturantëve të shkollave profesionale. Ndaj për këto arsye në shkollat e mesme vijohet të hidhen në sistem të dhënat e maturantëve, përgjatë tri viteve. Edhe pse afati i fundit në rregullore të Maturës Shtetërore është përcaktuar data 15 korrik.
“Brenda datës 15 korrik, të gjithë maturantët që duan të vazhdojë studimet duhet të plotësojnë bazën e të dhënave për të gjitha vitet e shkollës së mesme” përcaktohet në pikën 8, neni 10 të Rregullores së Maturës Shtetërore 2016. “Aplikimi në universitetet publike dhe private do të bëhet online nëpërmjet formularit të aplikimit, në bazë të grafikut të datave që do të përcaktohen për çdo DAR/ZA”,-theksoi Malaj. Sa i përket tarifës që do të duhet të paguajnë maturantët për aplikim ajo do jetë 2 mijë lekë. “Plotësimi i formularit të aplikimit, ashtu si është vepruar vitet e tjera me plotësimin e formularit A2, do jetë kundrejt një pagese prej 2 mijë lekësh”,- sqaroi Malaj.
Sipas zv.ministres aplikimi do të kryhet në fund të muajit korrik, pasi Agjencia Kombëtare e Provimeve të ketë hapur portalin “matura shtetërore online”. Formularin e aplikimit kanë të drejtë ta plotësojnë të gjithë maturantët që kanë kaluar me sukses provimet e Maturës Shtetërore 2016, si dhe kandidatët e viteve të mëparshme që kanë plotësuar formularin A1Z. Po ashtu, sistemi automatik skualifikon aplikantët që nuk kanë mesataren 6 apo një mesatare të dytë për degë specifike të miratuara nga vetë universitetet.
Nëse maturanti aplikues e ka mesataren e futur në sistem nga sekretaritë mësimore të shkollave të mesme më të vogël se 6.0, atëherë ai mund të përzgjedhë vetëm programet e studimit dyvjeçar (profesionale) që ofrohen nga disa universitete shtetërore dhe private, në bazë të vendimit të qeverisë. Pas aplikimit në portal, AKP u përcjell universiteteve numrin dhe gjithë të dhënat e aplikuesve për secilën degë. Ajo çfarë bëjnë universitetet në këtë moment është publikimi i listës së aplikantëve. Një vijë e kuqe përcakton fituesit e fazës së parë të cilët do të kenë 7 ditë kohë të bëjnë regjistrimin me dokumentacion në universitet.
BW/d.i.
