Unioni i Gazetarëve Shqiptarë denoncon me forcë dhunën e ushtruar gjatë ditës së djeshme, në mënyrë të pashembullt mbi disa përfaqësues të medieve të ndryshme, gjatë raportimeve për protestën e opozitës së vendit. Me anë të një deklarate, Unioni tha se dhuna fizike mbi reporterë dhe operatorë të disa medieve si Top Channel, ABC News, Report TV etj, përbën një akt të pandodhur prej kohësh në praktikën e raportimit të veprimtarive apo aktiviteteve politike në vend.
“Dhuna fizike, agresiviteti verbal dhe sidomos aktet e dhunimit dhe shkatërrimit të mjeteve profesionale të punës nga persona të ndryshëm në mjedise të ndryshme, shpesh edhe të maskuar, gjatë kësaj veprimtarie përbëjnë një goditje mbi gazetarët dhe mediet e vendit. Fatkeqësisht në kësi aktesh nuk mungojnë edhe individë të veshur me uniformën e policisë, çka e bën edhe më shqetësuese situatën. UGSH kërkon nga autoritetet e Policisë së Shtetit të identifikojnë dhe vënë para përgjegjësisë ligjore të gjithë personat që dhunuan gazetarët dhe punonjësit e medieve”, thuhet në deklaratën e UGSH-së.
“Kërkojmë nga autoritetet e drejtësisë të hapin procese për secilin rast dhe të hetojnë dhe ndëshkojnë ligjërisht personat që morën përsipër dhunimin e përfaqësuesve të medies. Në të njëjtën kohë apelojmë pranë autoriteteve më të larta institucionale dhe shtetërore të reagojnë energjikisht për ndaljen e klimës agresive dhe të rrezikshme ndaj gazetarëve dhe medieve”, vijon deklarata.
“U kërkojmë drejtuesve të opozitës politike të vendit të ushtrojnë ndikimin e tyre për garantimin e normalitetit dhe sigurisë ndaj çdo gazetari, fotoreporteri dhe operatori ndërsa, janë në krye të detyrës për pasqyrimin e veprimtarive dhe aktiviteteve politike në liri dhe mëvetësi të plotë. Rikthimi apo ripërsëritja e dhunës mbi gazetarët është akt kriminal mbi gazetarët në përgjithësi. Sekuenca dhe akte të tilla e kthejnë Shqipërinë pas dhe e renditin atë ndër vendet me demokraci plotësisht të kërcënuar”, thuhet në deklaratë.
Unioni i Gazetareve Shqiptare gjatë ditëve në vijim do të kërkojë me këmbëngulje dhe forma të shumta, ndëshkimin e dhunuesve të gazetarëve dhe punonjësve të medieve gjatë episodeve dhe zhvillimeve të datës 11 maj. “Për organizatën tonë liria dhe siguria e gazetarëve pas ngjarjeve të tilla, jane të rrezikuara dhe provokuara si asnjëherë tjetër”, përfundon Unioni i Gazetarëve Shqiptarë.
