Unioni i Gjyqtarëve: Vettingu, jo kushtetues, duhet shfuqizuar

Unioni i Gjyqtarëve deklaroi sot se Vettingu, si pjesë e paketës për reformën në drejtësi është në papajtueshmëri me Kushtetutën. Me një qëndrim të qartë Unioni thekson se Gjykata Kushtetuese duhet të shfuqizojë këtë ligj. Pak ditë më parë Kushtetuesja ‘ngriu’ ligjin për ‘Vettingun’, ndërsa pohoi se ai duhet t’i përcillet Komisionit të Venecias.
Gjykata Kushtetuese vendosi pezullimin dhe zbatimin e ligjit të “Vetting”-ut më 25 tetor. Vendimi u mor nga tetë gjyqtarë, të cilët morën në shqyrtim ankimimin e Partisë Demokratike, e cila deri në shpalljen si antikushtetues të “Vettingut”, kërkonte pezullimin e zbatimit të tij. Kushtetuesja gjithashtu vendosi po t’i drejtohet Komisionit të Venecias, për të marrë një opinion përfundimtar, nëse kjo gjykatë mund ta shqyrtojë këtë ligj duke qenë se gjyqtarët e saj preken nga “Vettingu”.
“Qendrimi i Asamblese se Unionit te gjyqtareve te Shqiperise eshte se, ligji per Vettingun ka papajtueshmeri me Kushtetuten e Republikes se Shqipererise dhe per pasoje, do ti kerkoje Gjykates Kushtetuese shfuqizimin e ketij ligji. Gjithashtu, asamblea autorizoi Bordin Drejtues qe te shqyrtoje edhe ligjin per Statusin e Gjyqtarit dhe Prokurorit pasi, ne disa pjese te tij edhe ky ligj vjen ne kundërshtim me dispozitat kushtetuese!”, thuhet në reagimin e Unionit të Gjyqtarëve.