Unioni i bizneseve gjermano-shqiptare në Gjermani ka dhënë 100 bursa për studentet femra të Universitetit të Prishtinës, si dhe disa bursa për studentet e Luginës së Preshevës dhe të Maqedonisë.
Kryetari i këtij Unioni, Nazmi Viqa, tha se “Unioni i bizneseve shqiptaro-gjermane në Gjermani për studentet shqiptare ka ndarë 100 bursa me vlerë prej 120 mijë euro. Përfituese të këtyre bursave janë edhe studentet që vijnë nga Lugina e Preshevës dhe Maqedonia”.
“Duke i ditur vështirësitë e shumta që i kanë vajzat shqiptare për shkollim në Kosovë dhe duke pasur parasysh gjendjen e fëmijëve tanë, që shkollohen në universitete gjermane dhe përgjithësisht nëpër Evropë edhe në tërë botën e zhvilluar, dëshirojmë t’iu krijojmë kushte përafërsisht të njëjta si fëmijëve tanë së paku në planin financiar”, nënvizoi Viqa.
Ministri i Arsimit, Arsim Bajrami u shpreh se “sot kemi një shembull shumë të mirë të ndihmës që mund të japin bizneset në edukimin e rinisë sonë dhe ky është një prej shembujve më të mirë se si mund të ndihmohet zhvillimi i vendit tonë duke e zhvilluar dhe duke mbështetur studentët tanë në studimet akademike, në ndërtimin e personaliteteve të veta dhe në kontributin që duhet t’i japin Kosovës në zhvillimin ekonomik”.
“Shembulli i Unionit të Bizneseve Shqiptaro-Gjermane është një shembull me dy domethënie: e para biznesmenë të suksesshëm në cilindo vend të Bashkimit Evropian mund të tregohen të suksesshëm por kemi edhe njerëz që donë vendin, që e kanë ndjenjën e atdhedashurisë dhe që janë në gjendje që një pjesë të fitimit të bizneseve të veta ta investojnë aty ku është më e rëndësishmja pra tek rinia, tek vajzat tona”, tha ministri Bajrami.
Përfaqësuesi i këtij Unioni, Vllaznim Kelmendi, theksoi se “ne do të vazhdojmë me vazhdimin e bursave, prandaj falënderojmë të gjithë anëtarët e kryesisë së Unionit edhe anëtarët që na kanë përkrahur”
Unioni i Bizneseve Shqiptaro-Gjermane vitin e kaluar ka ndarë 35 bursa.
