Gjithnjë e më shumë të rinj nga vendet e Azisë po zgjedhin Shqipërinë si një mundësi të re për të punuar dhe jetuar . Mes tyre është edhe Zar Kyi Hlaing, 28-vjeçarja nga Myanmar, e cila ka zgjedhur të vijë në vendin tonë për të ndërtuar një eksperiencë të re profesionale dhe personale. Ajo tregon se vendimi për të ardhur në Shqipëri ishte një hap i rëndësishëm në jetën e saj. Një vend i ri, një kulturë ndryshe dhe një ambient i panjohur, por me dëshirën për të punuar dhe për të provuar mundësi të reja.
“Unë vij nga Myanmar dhe kam ardhur këtu për të punuar. Në fillim gjithçka ishte e re për mua, sepse vendi, njerëzit dhe mënyra e jetesës ishin ndryshe nga ato që njihja në vendin tim. Kishte disa vështirësi në fillim, sidomos me përshtatjen dhe komunikimin, por me kalimin e kohës fillova të mësohem dhe tani ndihem më mirë”, shprehet ajo.
Prej kohës që ndodhet këtu, ajo është përshtatur me jetën shqiptare dhe me ambientin e punës. Ajo shprehet se ka njohur njerëz mikpritës dhe se eksperienca në Shqipëri i ka dhënë mundësinë të mësojë gjëra të reja dhe të zhvillojë aftësitë e saj.
“Njerëzit që kam takuar më kanë ndihmuar dhe kjo e ka bërë më të lehtë qëndrimin tim. Unë vazhdoj të punoj, të mësoj dhe të ndërtoj përvojën time. Për mua kjo është një mundësi e mirë për të pasur një jetë më të mirë dhe për të fituar më shumë eksperienca për të ardhmen”, tha ajo.
Si çdo person që largohet nga vendi i tij, edhe për Zar ka pasur sfida gjatë këtij rrugëtimi. Ndër vështirësitë kryesore mbetet gjuha dhe përshtatja me një kulturë të ndryshme, por ajo po përpiqet të integrohet dhe të krijojë një jetë të re.
“Arsyeja pse erdha këtu ishte puna dhe mundësia për të krijuar një eksperiencë të re. Puna më ka ndihmuar të mësoj gjëra të reja dhe të përmirësoj aftësitë e mia. Edhe pse ka dallime mes vendit tim dhe këtij vendi, unë po përpiqem të përshtatem me kulturën dhe mënyrën e jetesës këtu“, vlerëson ajo.
Historia e Zar Kyi Hlaing është një tjetër shembull i të rinjve që po zgjedhin Shqipërinë si një vend ku mund të punojnë dhe të fitojnë eksperienca të reja. Për të, ky udhëtim është një mundësi për rritje personale dhe profesionale, duke zbuluar një vend të ri dhe një kulturë të re.
