Teksa njoftoi vendimin e qeverisë për ta bërë maskën e detyrueshme në çdo ambjent nga java e ardhshme, kryeministri Edi Rama njoftoi se edhe ai vetë që deri sot nuk e ka mbajtur maskën jashtë, do ta vendosë nga e enjtja e tutje.
Rama: Edhe unë që deri sot nuk e kam mbajtur maskën jashtë do ta mbaj, brenda nuk diskutohet.
Rama u rezervoi një përgjigje edhe qytetarëve dhe pronarëve të lokaleve për mos lejimin e organizimit të dasmave dhe muzikës live.
Shefi i qeverisë i sfidoi të gjejnë një vend të Europës ku ka organizime të tilla.
Rama: Dëgjoj që duan dasma. Është gjëja më e natyrshme, por shikoni pak masat për ndalimin e të gjitha ceremonive në mjedise jo private me më shumë se 12 persona. Shikoni Italinë dhe gjithë Europën. Duan muzikë, shkoni dhe gjeni një vend me muzikë të cilitdo vend të Europës. Nuk janë dëshira dhe teka, por masa elementare.
Rama shtoi se objektivi i çdo shqiptari në këtë sezon vjeshtë-dimër duhet të jetë shmangia me çdo kusht e një karantine të dytë të përgjithshme.
Rama: Jemi në kushtet kur mund ta përballojmë këtë fazë të vjeshtë-dimrit dhe ardhjen e ngripit të sezonit pa u mbyllur. Objektivi i çdo shqiptari duhet të jetë të mos mbyllemi në shtëpi. Nuk duhet asgjë më shumë se një maskë e thjeshtë që mund ta gjesh në dyqan apo ta bësh vetë.
g.kosovari
