Plot 1200 kilometra kishte përshkruar me kamion një 15-vjeçar nga Shqipëria, vetëm për t’i shpëtuar dhunës nga i ati.
I mituri u zbulua dje në Itali, teksa shërbimet sociale e raportuan rastin në polici. Lajmi mësohet nga e përditshmja “La stampa”, në të cilën thuhet se djaloshi u gjet pranë një stacioni.
“Unë ika nga Shqipëria, për shkak se babai im ka abuzuar me mua.” Kjo është fraza që kanë dëgjuar shërbimet sociale nga djali shqiptar 15 vjeç, i cili është gjendur ditët e fundit në stacionin Moncalieri, pasi kishte raportuar një qytetar.
Shërbimet sociale e kanë përcjellë incidentin në polici. Djali ka rrëfyer se iku nga Shqipëria, për shkak të keqtrajtimit të vazhdueshëm nga babai i tij. Ai kishte mbërritur në Itali në bordin e një kamioni, në rrethana të paspecifikuara, pas një udhëtimi prej 1200 kilometrash.
Ndërkaq, 15-vjeçari është aktualisht në një komunitet social në Moncalieri, teksa policia lokale po verifikon rrethanat e këtij rasti. Momentalisht ai po mbahet nën kujdes social, derisa të sqarohet vërtetësia e dëshmisë së tij. Mes rrëfimeve, 15-vjeçari, për të cilin nuk bëhet i ditur identiteti apo vendbanimi, ka thënë se i ati e rrihte vazhdimisht dhe dhuna e tepërt e detyroi të shkonte në Itali, për të kërkuar ndihmë.
