“Armik të zemrës”, kështu e cilëson mjeku Anesti Kondili duhanin.
Me një pasion që buron nga përvoja klinike dhe personale (pasi vetë e ka lënë duhanin dekada më parë), ai përshkruan dëmin fiziologjik:
“Nikotina shkakton spazma të enëve të gjakut, ndërsa tymi zëvendëson oksigjenin jetik”, thotë ai për “Dritare Tv”.
Mjeku përmend faktin se si ndalimi i duhanit në ambiente publike ka qenë një fitore e madhe për shëndetin publik, duke mbrojtur edhe ata që ishin viktima të duhanpirjes pasive.
Ai shpreh keqardhje të thellë për trendin e ri të vajzave të reja që pijnë duhan për ‘modë’, duke mos kuptuar dëmin afatgjatë që po i bëjnë sistemit të tyre kardiovaskular.
Mjeku, duke sjellë shembullin e tij personal të lënies së duhanit pas 50 vitesh, theksoi dëmin e jashtëzakonshëm që nikotina dhe monoksidi i karbonit i shkaktojnë endotelit të enëve të gjakut. Ai ilustroi se si pirja e duhanit shkakton spazma dhe redukton oksigjenin në gjak, duke e bërë zemrën të punojë në kushte mbijetese.
Hipertensioni arterial dhe diabeti janë dy faktorë të tjerë madhorë që analizohen. Doktori vë në dukje një ndryshim drastik statistikor: nëse dekada më parë vetëm 20% e pacientëve me infarkt kishin diabet, sot kjo shifra shkon drejt 50%.
Kjo lidhet drejtpërdrejt me mënyrën e ushqyerjes dhe mungesën e lëvizjes. Hipertensioni, nga ana tjetër, vepron si një forcë mekanike që dëmton shtresën e brendshme të enëve të gjakut, duke krijuar ‘çarje’ ku kolesteroli mund të depërtojë më lehtë.
