Zv.ministri i Infrastrukturës dhe Energjisë, Artan Shkreli tha se projekti teknik për Unazën e Re është bërë që në kohën kur qeveria drejtohej nga Sali Berisha. I ftuar në studion e lajmeve të Ora News, me gazetaren Beti Njuma, Shkreli tha se kostoja është sipas analizave të çmimit, duke qenë se do të jetë një rrugë me 10 korsi kostoja do të jetë më e madhe.
Artan Shkreli: Projektin teknik e ka bërë vetë qeveria e Sali Berishës, ky projekt është bërë në vitin 2009, ku është miratuar gjurma e Unazës së Madhe që kalonte pikërisht në këto territore.
Beti Njuma: Me këtë buxhet është bërë projekti i PD?
Artan Shkreli: Buxhetet ndryshojnë sipas tregut. Në 2009 ka pasur të tjera buxhete, dhe tani ka buxhete të tjera. Kostot janë sipas analizave të çmimeve. Janë zyrtare. Kostot bëhen mbi bazën e projektit. Ndryshe është një rrugë me dy korsi, ndryshe është një rrugë me 6 korsi. Kjo është një rrugë me 10 korsi. Një vlerë të konsiderueshme zë mbi kalimi. Për herë të parë në Shqipëri krijohet një mbi kalimi me tre nivele. Niveli nëntokë, niveli i tokës dhe niveli i mbikalimit. Kjo realizon një shpërndarje të trafikut.
Në lidhje me akuzat e PD për kompanite e tenderit, se njëra prej tyre ka qenën nën sekuestro, Shkreli tha se nuk ka dijeni për këtë.
Artan Shkreli: Nuk kemi të dhëna që ka qenë në sekuestro. Pa dashur të shmangemi përgjegjësisë, nuk merren ministritë me tendera. Tenderat bëhen nga ARRSH dhe besoj se ARRSH do jetë në gjendje ti japë përgjigje teknikaliteteve juridike si është bërë tenderimi.
Shkreli tha se protestat e banorëve janë marrë në konsideratë, pasi për ta do të garantohet një qira për dy vjet dhe po ashtu qeveria ka hapur një fond i vecantë.
Artan Shkreli: Meqë më përmendet pjesën e traktit rrugor që është bërë nga PD. Këtu janë dokumentacionet e këshillit teknik të bërë në kohën e PD, kryetari i këshillit teknik, Taulant Zeneli. Flitet për traktin e kësaj unaze nga shkolla Teknologjike deri tek Komuna e Parisit dhe aty kemi 160 e ca objekte që prekeshin. Ata njerëz u prekën nga ky projekt. Projekti nuk parashikonte asnjë modalitet që ta zbuste çështjen sociale të këtyre njerëzve dhe asnjë nga PS nuk doli që të mbështeste protestën e banorëve.
Ndërsa në rastin e kësaj pjesë rruge, nga Shkolla Teknologjike deri tek Shqiponja, numri nuk është i njëjtë, flitet për 240 objekte. Në këtë rast merren parasysh dy gjera: E para është caktuar një fond që këta banorë do të trajtohen për 2 vjet me qira. E dyta gjatë kësaj kohe qeveria shqiptare ka hapur një fond të veçantë për banesat e familjeve në nevojë dhe i gjithë ky kontigjent i Unazës së jashtme të Tiranës do të trajtohet me prioritet. Madje mesa di unë edhe bashkia e Tiranës ka një 3% që do të shkojë për banesat sociale.
ARRSH, ALUIZNI, IKMT dhe bashkia kanë shkuar shtëpi më shtëpi, po bëjnë regjistrim. Të gjitha ata që janë të hipotekuar do të trajtohen me dëmshpërblim.
Shkreli tha se Shqiponja që u hiq nga sheshi që mban të njëjtin emër është më inventarin e bashkisë dhe është në një vend ku ruhet. Më vonë do të diskutohet mundësia e vendosjes ose jo në një tjetër vend.
Artan Shkreli: Shqiponja është hequr me kujdes, pra nuk ka akt vandal. Bashkia e ka në inventarin e saj, e ka depozituar në një vend ku ajo ruhet. Më vonë do shikohet mundësia se çfarë mund të bëhet. Është një vendim që do ta marrë bashkia. Kjo do të diskutohet.
