Kryetari i PD-së Lulzim Basha po zhvillon një vizitë në Britani të Madhe, ku ka marrë një tjetër thirrje të fortë nga ndërkombëtarët që të ulet në bisedime pa kushte me kryeministrin Edi Rama.
Pas takimeve me konservatorët, Basha ka zhvilluar një takim në mesditë në orën 14:00 me Andrew Page, që është drejtori për Ballkanin Perëndimor në Britaninë e Madhe.
Report TV mëson se qëndrimi i Andrew Page ishte i prerë: Basha duhet të ulet në negociata me kryeministrin Edi Rama pa parakushte, përndryshe zgjedhjet e 30 qershorit do të njihen edhe sikur të gjitha bashkitë të fitohen nga PS.
PD ndërkohë nuk e ka përmendur fare këtë takim.
Në një deklaratë për mediat, PD thotë se gjatë vizitës së punës në Londër, Basha dhe delegacioni që e shoqëron u prit nga kryetari i Komisionit për Punët e Jashtme në Parlamentin Britanik, Tom Tugendhat.
Në këtë takim, sipas zyrës së shtypit të PD-së, lideri i opozitës konfirmoi angazhimin e Partisë Demokratike dhe të gjithë opozitës së bashkuar për një zgjidhje politike të krizës, që do të garantojë zgjedhje te lira dhe të ndershme, duke ndarë politikën nga krimi, duke i zgjidhur duart drejtësisë që të vërë para ligjit politikanët e përsfshirë në shitblerje votash me krimin e organizuar si dhe afera të tmerrshme korruptive.
“Reformë e thellë politike për fuqizimin e rolit të qytetarit sipas praktikave më të mira të vendeve demokratike perëndimore është angazhimi ynë”, theksoi Basha, sipas PD-së, e cila nuk ka pasqyruar ndërkohë takimin tjetër, ku ai ka marrë mesazhin e prerë.
/a.rada
