Intervistë me një nga krerët e FAF-it (First Armenian Front), grupimit më të madh të ultrasëve të futbollit armen. Arsen Zaqaryan, siç do të identifikohet, tregon se grupimi i tyre i ka hedhur poshtë pretendimet e shefit të Federatës armene Ruben Hayrapetyan, se ekipi përfaqësues armen e shiti ndeshjen me Shqipërinë dhe i kërkon dorëheqjen për gabimet e tij…
Intervistoi Ben Andoni / JAVA NEWS
Problemi i madh nuk është fenomeni i shitjes së ndeshjes, por se lojtarët armenë e kanë tejkaluar me klasin e tyre nivelin e trajnerëve të sotëm që janë në qarkullim në Armeni, por edhe vetë nivelin e presidentit të Federatës Armene, thotë Zaqaryan. Në këtë intervistë për Javanews, ai shprehet se performanca e ekipit të tyre përfaqësues ishte më e dobëta deri më tani në eliminatoret e ndonjë evropiani dhe se lojtarët aktualë armenë nuk i meritojnë trajnerët që kanë. Por, nga ana tjetër, mendojnë se kjo ka qenë dhe një taktikë e presidentit Hayrapetyan, për të futur në përçarje dy grupimet më të mëdha të tifozerisë armene FAF dhe Red Eagle. Front i parë Armen(FAF) është grupimi më i vjetër dhe më i populluar i klubit të tifozerisë në Armeni. Ata mbështesin ekipin kombëtar të futbollit armen, por gjithashtu mbështesin edhe skuadrat kombëtare të vendit të tyre në disiplina të tjera, pavarësisht nga mosha dhe gjinia. Ata kanë mijëra anëtarë armenë në mbarë botën.
FAF beson se edhe nëse do të kishte pasur ndonjë element shitje, siç pretendohet me Shqipërinë, ajo nuk do të arrihet të provohet dot asnjëherë, kurse dinë me bindje se performanca e presidentit të tyre është e dobët dhe pa shumë nivel.
Ndërkohë që presidenti i Federatës Armene të Futbollit, Ruben Hayrapetyan, pak pas mbarimit të eliminatoreve Evropianit ka lëshuar akuza konkrete dhe të rënda ndaj Kombëtares Armene. Ai do të shprehej se: “Federata e Futbollit dhe Kombëtarja Armene e Futbollit janë pasuri e të gjithë kombit. Është normale që të gjithë të ankohen. Unë, si president i federatës do të bëj gjithçka në mundësitë e mia për të kapërcyer këtë krizë. Futbollistët e Kombëtares tonë, thjeshtë nuk duan të luajnë futboll”, kurse “referuar përballjes kundër Shqipërisë, atëherë, në atë rast kishte tradhti gjatë ndeshjes. Sikur edhe trajneri më i mirë të drejtonte ekipin në ndeshjen kundër Shqipërisë, rezultati do të mbetej i njëjtë”, deklaroi presidenti i Federatës Armene të Futbollit, Ruben Hayrapetyan, sipas asaj që raporton “Armenpress”.
Megjithatë, larg tyre, duket se presidenti duhet të japë dorëheqjen, pasi tani konflikti nuk është vetëm me tifozët, por edhe me lojtarët. Ndërkohë që fiksimi i ndeshjeve nuk është ndonjë fenomen kërcënues në Armeni, por sipas tij, FAF gjithnjë e më shumë po konstaton se po përfliten gjyqtarë lokalë se e bëjnë këtë…
A i besojnë ultrasët dhe grupet e tjera të tifozerisë armene se ekipi kombëtar armen, sipas akuzës së presidentit të federatës suaj, e shitën ndeshjen me Shqipërinë?
“Shumica e tifozëve armenë e konsiderojnë të ashtuquajturin manipulim të ndeshjes me Shqipërinë si spekulim dhe duke marrë parasysh se edhe shumica e lojtarëve kyç të ekipit e kanë mohuar publikisht çdo pretendim të këtij lloji, për ne është bërë e qartë se thashethemnaja në lidhje me manipulimin e ndeshjes u përhap nga federata për të devijuar vëmendjen e publikut nga një performancë e ekipit tonë për të thënë shumë e mjerë. Kjo është bërë nga Presidenti i Federatës për t’i shpëtuar përgjegjësisë, sepse, në kundërshtim me pritjet tona, kjo ishte performanca kualifikuese më e keqe në histori për ekipin përfaqësues. E cilat nga ana tjetër çoi fillimisht dhe në kërkesën e ultrasëve tanë, lëvizjen më të madhe të tifozerisë në Armeni, për të kërkuar dorëheqjen e presidentit të FFA .
Ndërkohë, një taktikë interesante është përdorur për të turbulluar lëvizjen e protestave kundër Federatës mu në kulmin e saj. Kur e gjithë vëmendja e mediave ishte e përqendruar rreth çështjeve të performancës së dobët, Fan Club alternativ (Eagles Red) vendosi të mos bashkohet me protestën. Presidenti i federatës vendosi të takohet me Red Eagles, ndërsa refuzoi të takohet me FAF, që kërkon largimin e tij. Për më tepër Red Eagles deklaroi se ata nuk e kërkojnë dorëheqjen e presidentit, ndryshe FAF-it”.
Si ishte reagimi i njerëzve të zakonshëm me këto pretendime?
“Tifozët armenë janë të përkushtuar për t’i kërkuar presidentit të federatës përgjigje, por edhe arsyen sepse është duke përdorur të gjitha taktikat e mundshme për të devijuar vëmendjen nga paraqitja e dobët. Për mendimin tim, akuzat për fiksimin e ndeshjes me Shqipërinë nuk do të provohen dot kurrë dhe rezultatet kualifikuese të vedit tuaj në Euro 2016 nuk do të jenë nën pikëpyetje. Megjithatë duket se presidenti duhet të japë dorëheqjen, pasi tani konflikti nuk është vetëm me tifozët, por edhe me lojtarët.
Problemi i vërtetë qëndron në faktin se klasi i lojtarëve tanë e ka tejkaluar nivelin e trajnerëve tanë dhe madje edhe vetë nivelin e Presidentit tonë të Federatës dhe për më tepër taktikat e përdorura prej tij për të menaxhuar federatën nuk janë më produktive. Lojtarët janë më të pavarura tani dhe refuzojnë të nënshtrohen kur ndihen të keqtrajtuar, si në këtë rast. Për arsye se lojtarët nuk e mbështetën këtë lëvizje të Federatës, ka të ngjarë që thashethemet të mbarojnë shpejt”.
A ekziston në Armeni fenomeni i manipulimit të ndeshjeve?
“Për arsye se s’ka pasur fakte për të provuar manipulimin e ndeshjeve, unë nuk mund të pretendoj se ekziston fenomeni i fiksimit të ndeshjeve, por nga koha në kohë ne dëgjojmë për sjellje të pazakontë të gjyqtarëve tanë. Por problemet më të dukshme janë ato që duket se ka presion nga vetë presidenti. Ai përdor influencën e tij për të kërcënuar lojtarët, gjyqtarët dhe madje edhe pronarët e klubeve”.
