Protestën të cilën e ka paralajmëruar një iniciativë qytetare e sapothemeluar, kryetari i komunës së Mitrovicës, Agim Bahtiri e ka kundërshtuar ashpër dhe e ka quajtur të dëmshme për zbatimin e marrëveshjes së Brukselit të vitit të kaluar, sipas të cilës ura do të hapet për qarkullim në fund të qershorit.
“Apeloj te të gjithë qytetarët që mos të marrin pjesë në këtë protestë dhe në asnjë tjetër, pasi që me protesta vetëm dëmtohet procesi i rivitalizimit dhe hapjes të urës së Ibrit.
Me protesta, të cilat fatkeqësisht shpeshherë në Mitrovicë kanë eskaluar edhe në dhunë, nuk mund të arrihet asgjë, sepse në krye të këtij procesi është BE-ja dhe kryetari i Mitrovicës, dhe dihet se vetëm me dialog dhe zbatim të marrëveshjes mund të hapet ura dhe të kemi lëvizje të lirë”, shtoi kryetari Bahtiri, raporton Koha.net.
Ai ka thënë se nuk ka informacione kush janë organizatorët e protestës, të cilëve iu ka referuar si “njerëz anonimë” të cilët mund të jenë “të ndikuar nga qarqe të caktuara për të krijuar destabilitet në Mitrovicë”. (b.an)
