Përmirësimi i klimës së investimeve në vend, ka dhënë kontribut në rritjen e prodhimit minerar dhe zhvillimin e industrisë së përpunimit të mineraleve.
Ekspertët e këtij sektori, vlerësojnë se krijimi i kushteve konkurruese ligjore, fiskale dhe ndryshimet e ndërmarra për një përgjysmim të taksës së rentës nga 6% në 3%, synon t’i japë një stimul të ri kësaj industrie.
Sipas tyre, politikat fiskale lehtesuese kanë për qëllim nxitjen e përpunimit të mineraleve brenda vendit, duke sjellë rritjen e investimeve në industrinë e përpunimit minerar, si dhe rritjen e numrit të të punësuarve në këtë industri.
Ndërkohë që, përmirësimit të situatës në sektorin minerar i është paraprirë me një planifikim minerar, të bazuar në planifikimin territorial duke adresuar çështjet e mjedisit, sociale etj me qëllim përmirësimin e produktivitetit dhe konkurrencës.
Sot në këtë sektor, po përfundon puna për hapjen e pusit në Bulqizë, ku janë investuar deri më tani 12 milionë USD. Ndërkohë po vazhdon puna për hapjen e traverbankut të Qafë Buallit. Ndërsa në Uzinën e Ferrokromit Burrel (investimi 0.6 milion dollarë) vazhdon prodhimi me një furrë, si dhe po punohet për hartimin e projektit për zëvendësimin e dy furrave të tjera.
Në Uzinën e Ferrokromit Elbasan (investimi 1.5 milionë dollarë), është rritur me 35% sasia e ferrokromit të prodhuar, krahasuar me dy vite me parë dhe vazhdon që të investohet në sektorin e bakrit në minierat e Perlatit dhe Spaçit.
Industria e përpunimit minerar, ka një peshë të rëndësishme në ekonominë e vendit. Vendi ynë është shumë i pasur me minerale të ndryshme nëntokësore, të cilat janë të përcaktuara nga kërkim – zbulimet e kryera ndër vite dhe që vazhdojnë të kryen edhe tani, me qëllim shtimin e këtyre rezervave./a.m.
