Ndonëse kritizerët dhe ironitë e paragjykuan këtë aksion, duket se masat e Bashkisë së Tiranës po japin efektin e duhur në uljen e numrit të qytetarëve që urinojnë poshtë urave të Lanës. Të dhënat nga Policia Bashkiake tregojnë se numri i personave që urinojnë në hapësirat publike janë gjithmonë e më shumë në ulje. Nga Bashkia e Tiranës mësohet se deri më tani në dy javë janë gjobitur 300 kundravajtës, një pjesë e mirë e tyre lidhet me urinuesit poshtë urave të Lanës.
Duke iu referuar numrit të gjobave të marra gjatë kësaj periudhe të aplikimit të masave ka një ulje të numrit të personave që janë gjobitur për ndotje të hapësirave publike. Nga ana tjetër, Këshilli Bashkiak i Tiranës pritet që të miratojë sot rritjen e gjobave deri në katër herë për ata që vandalizojnë hapësirat publike. Këto masa janë propozuar nga kryetari i Bashkisë së Tiranës, Erion Veliaj, i cili vlerëson se ashpërsimi i gjobës do të ndikojë pozitivisht në uljen e numrit të abuzuesve.
