Bordi i Transparencës ka vendosur uljen e çmimeve të karburanteve në mbledhjen e zhvilluar këtë të enjte, 7 maj 2026.
Sipas vendimit të ri, nafta do të tregtohet me jo më shumë se 196 lekë për litër duke u ulur me 10 lekë, ndërsa benzina u ul me 4 lekë dhe do të shitet me 180 lekë për litër.
Vendimi hyn në fuqi sot në orën 12:00 dhe do të mbetet i vlefshëm deri në mbledhjen e ardhshme të Bordit, ku do të reflektohen ndryshimet e reja të tregut.
“Çmimi me pakicë i gazoilit standard SSH EN 590 do të jetë maksimumi 196 lekë/litër, ndërsa me shumicë 184 lekë/litër.
Çmimi me pakicë i benzinës do të jetë maksimumi 180 lekë/litër, ndërsa me shumicë 168 lekë/litër.
Bordi thekson se çdo operator i tregtimit me shumicë dhe pakicë është i detyruar të zbatojë këtë vendim, ndërsa në rast shkeljesh do të vendoset pezullim i aktivitetit.
SQARIM: Referuar Aktit Normativ nr. 1, Datë 3.4.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, ku është parashikuar, se në rast se çmimi i shitjes me pakicë, për gazoili është më i lartë se 220 lek/litri, apo për benzinën është më i lartë se 200 lek/litri, zbatohet niveli 80% i akcizës. Bazuar në zbatimin e metodologjisë per llogaritjen e cmimeve tavan te shitjes me pakice, çmimet janë nën kufirin e Aktit Normativ nr. 1, datë 3.4.2026, dhe për rrjedhojë niveli i akcizës do të zbatohet i plotë, 100%.”, thuhet në njoftim.
