Ujësjellës-Kanalizime Tiranë ka dhënë alarmin për ujin që shpërndahet me auto-botë në kryeqytet, duke thënë se është i patrajtuar. Nga një aksion i UKT për kontrollin e botëve të ujit, ka rezultuar se kushtet higjienike të këtyre auto-botëve nuk kontrollohen nga asnjë institucion i specializuar, pasi asnjë subjekt privat nuk ka licencë për të shitur ujë me shumicë në treg.
Gjatë aksionit 24-orësh, UKT konstatoi 2 pika mbushje përgjatë tubacionit kryesor, pozicionuar thellë në pyll, duke shoqëruar 5 drejtues auto-botësh, të cilët nuk kishin leje dhe licencë për tregtimin e ujit.
Njoftimi i Ujësjellës Kanalizime Tiranë
“Prej ditësh UKT me mbështetjen e Policisë së Shtetit, ka nisur një aksion kontrollesh mbi botet e ujit që qarkullojnë në Tiranë. Pas vëzhgimeve të kryera në zonën e Lanabregasit, ku edhe dyshohej se kryhet mbushja e këtyre boteve, u zbuluan vendet ekzakte ku ndodh proçesi i mbushjes së tyre. Në mënyrë të paligjshme këta tregtues ndërhyjnë në linja kryesore të transmetimit të ujit. Përmes këtyre linjave uji drejtohet për në depot e ujësjellësit të Tiranës për tu trajtuar sipas të gjitha parametrave dhe specifikave të përcaktuara me Vendim të Këshillit të Ministrave nr. 379 dt.25.05.2016. Pra, uji i vjedhur duke dëmtuar këto linja, është ende i patrajtuar.
Për më tepër kushtet higjenike të këtyre auto-boteve nuk kontrollohen nga asnjë institucion i specializuar për këtë proçes, duke qënë se asnjë subjekt privat nuk ka liçensë për të shitur ujë me shumicë në treg.
Gjatë aksionit i cili vijon 24 orë pa ndalesë, janë konstatuar 2 pika mbushje përgjatë tubacionit kryesor, pozicionuar thellë në pyll, si dhe janë shoqëruar 5 drejtues auto-botesh të cilët nuk ishin të pajisur me leje dhe liçensa për tregtim uji me shumicë. UKT i bën thirrje të gjithë qytetarëve të tregohen të kujdesshëm, duke mos blerë nga subjekte të paliçensuara të cilët tregtojnë ujë të patrajtuar dhe jashtë standartit!”
ma.me
