Situata në terrenin Ukrainas tashmë duket e ngrirë si fushëbeteja ku ajo po zhvillohet, palët janë pozicionuar në transhe dhe janë episode si ai i sulmit në bazën ruse të Makiivka, që sipas Kievit ka shkaktuar vdekjen e 400 ushtarëve rusë, ndërkohë që vetë Kremlini flet për dhjetëra të tillë.
Por sipas zyrtarëve ukrainas, Moska po përgatitet për një ofensivë të madhe në shkurt, kur do të mbush ekzaktësisht një vit nga fillimi i fushatës.
“Për ta, këto data janë të rëndësishme dhe ne jemi të bindur që ata po organizojnë një ofensivë për atë periudhë”, deklaroi sekretari i Këshillit të Sigurisë ukrainas, Oleksii Danilov.
Ai shtoi se Kremlini ka filluar një lobing të fortë për të bindur lidershipin ukrainas dhe veçanërisht presidentin Zelensky që të firmosë një marrëveshje paqeje, që mund të jetë vazhdimi i marrëveshjeve të Minskut. Danilov shtoi se Kievi nuk do të pranojë asnjë nga këto marrëveshje.
Por ukrainasit po fillojnë që tani të përgatiten dhe i kanë kërkuar amerikanëve dhe aleatëve të NATO-s përforcime të tjera. Vetë presidenti amerikan Joe Biden dje gjatë një takimi me gazetarët ka pohuar se SHBA mund të dërgojë mjetet luftarake Bradley në Ukrainë, më të përshatshëm se tanket në terrenin e vështirë në dimër.
Mbështetje mjetesh të rënda Kievit i kanë ardhur edhe nga Franca, siç ka pohuar vetë Zelensky.
Ndërkohë, autoritetet ushtarake të Kievit kanë deklaruar që qyteti strategjik i Bahkmut, ku po përqendrohet pjesa më e madhe e dyluftimeve, është shkatërruar me 60%, edhe pse rusët sipas tyre janë tërhequr nga qyteti, dhe ndodhen në një terren të zbrazet ku janë tashmë pre e sulmeve që po i kushtojnë shumë viktima.
/a.r
