Një tren që transportonte naftë ka shpërthyer në flakë në Buryatia, në lindje të Rusisë. Ky është rasti i dytë gjatë kohëve të fundit pasi më herët një tren kishte shpërthyer brenda tunelit më të gjatë në Rusi.
Kjo linjë hekurudhore përdoret për transportimin e municioneve nga Koreja e Veriut, për të furnizuar ushtrinë e Vladimir Putin në luftën e saj në Ukrainë.
Ekspertët, të cituar nga “Daily Mail”, janë shprehur se kjo është një përpjekje e qartë e shërbimeve sekrete ukrainase për të bllokuar transportin e municioneve nga Koreja e Veriut. Lideri i Koresë së Veriut, Kim Jong-un, që pas takimit të shtatorit në Vladivostok me Putinin, ka dërguar vazhdimisht municione e predha artilerie për ushtrinë ruse. Po ashtu, në një raport të fundit, kjo linjë konsiderohet edhe si rruga kryesore për importet nga Kina.
Pas shpërthimit të së enjtes në tunelin e Severomuysky, shërbimi sekret ukrainas mori përgjegjësinë e sulmit.
Në ngjarjen e fundit, katër vagonë cisternë u përfshinë nga flakë të mëdha, ndërsa dy të tjerë u dëmtuan nga zjarri. Është ende e paqartë sesi janë kryer sulmet, por dyshohet se mund të jenë vendosur mina mbi shina.
/f.s
