Ukrainasit “armatosen” përpara Botërorit, trajneri: I urrej rusët, dua të vras …

Në një intervistë për “The Guardian”, Oleksandr Petrakov, trajneri i kombëtares ukrainase, që do të luajë në “play off” kundër Skocisë dhe më pas fituesi do të luajë finalen me Uellsin për të siguruar biletën e fundit europiane të futbollit, tregoi zgjedhjen e tij për të qëndruar në Kiev dhe luftuar:

“Ka vetëm urrejtje. Nuk është zemërim, por njerëzit urrejnë ngjyrën që ka pushtuar tokën e tyre. Do të kemi kohë për t’u qetësuar, por tani ndiejmë vetëm urrejtje. Rusët kanë shkatërruar qytetet tona”.

64-vjeçari i është bashkuar ushtrisë ukrainase për të mbrojtur Kievin, por u ka bërë thirrje edhe bashkatdhetarëve të tjerë që të rrëmbejnë armët kundër Rusisë: “Familja ime më kërkoi që të spostohemi në perëndim të vendit, por refuzova. Unë jam nga Kievi dhe nuk mund të largohem. Nuk mendoj se do të ishte e drejtë, sepse njerëzit duhet të mbrohen dhe nuk mund të largohen. Nëse vijnë në Kiev thashë do të marr një armë dhe do ta mbroj qytetin tim.

Jam 64 vjeç, mendoj se mund t’i vras dy apo tre armiq”.

Ukraina duhet ta kishte luajtur “play off”-in kundër Skocisë më 24 mars, por ndeshja u shty në qershor dhe Federata Ukrainase po studion mundësinë për të luajtur disa miqësore jashtë vendit, ndoshta në Britani me disa klube angleze.

Në Kongresin e fundit të FIFA-s, të enjten në Doha, edhe presidenti i federatës ukrainase të futbollit, Andri Pavelko, mbajti një fjalim nga sheshi i Kievit i veshur me antiplumb, ku iu drejtua presidentit të FIFA-s, Xhani Infantino, dhe delegatëve. “Jam i sigurt se do ta fitojmë këtë luftë kundër agresorit. Le të dëgjohen thirrjet e tifozëve në rrugët e qyteteve tona në vend të sirenave të alarmit”./m.j