Reshjet e shiut që përfshinë Durrësit një natë më parë kanë përmbytur disa rrugë dhe lagje në qytetin bregdetar. Sipas Bashkisë, uji ka hyrë në rreth 300 banesa në total, nga të cilat 200 shtëpi janë ne zonën e Durrësit të Ri, 60 në zonën e Shkozetit dhe Plazhit, 4 banesa në njësinë administrative 4, 1 shtëpi në njësinë 1, 20 banesa në Sukth, 10 në Katund të Ri dhe 5 shtëpi në Rrashbull.
Në lajgen 17, pamjet e xhiruara nga grupi i A2 CNN tregojnë një situatë tepër problematike, me ujin që ka hyrë në shtëpitë dhe bizneset e zonës, duke shkaktuar dëme të mëdha.
“Kjo rrugë gjithmonë kështu mbytet. Asnjë nuk na ka marrë në telefon, asnjë nuk ka ardhur”, thotë për A2 CNN një banor i zonës. “Këtu ka qenë uji një metër, akoma në ujë po rrimë. Hipëm në kat të dytë, në dorë të Allahut… E gjithë shtëpia është përmbytur. Mund të ketë 10-15 herë që jemi mbytur dhe kalon uji mbi një metër e ca”.
Ministria e Mbrojtjes njoftoi se disa familja janë evakuuar nga zonat e përmbytura dhe janë dërguar te Kavalishenca, ndërsa gjatë natës forcat e ushtrisë punuan për largimin e ujit nga burgu i Durrësit.
Probleme të theksuara kanë rrugët dytësore në zonën e Durrësit të Ri, Shkozetit, Gjykata e Apelit, pjesërisht Zona e Plazhit, ndërsa rreth 40 ha tokë është nën ujë.
Ndërkohë vazhdon puna nga forcat në terren për largimin e ujit nga zonat e prekura nga reshjet intensive të shiut, në një pjesë të bashkisë së Durrësit. Në terren janë të angazhuara forca edhe nga MZSH, Autoriteti Portual, Bordi i Kullimit, ndërmarrjet e punëve publike të bashkisë.
