UEFA është gati të heqë kërcënimin e saj për bojkot të garave të FIFA-s pasi ka marrë garanci konkrete se organi qeverisës global nuk do të përpiqet kurrë të përsërisë planin e Gianni Infantinos për të shitur aksione në Kupën e Botës.
“The Guardian” raporton se skuadrat evropiane pritet të marrin pjesë në Kupën e Botës për Femra nën 20 vjeç, së bashku me turnetë pasues, pasi FIFA dha garancitë e detyrueshme se asnjë ekuivalent i skemës së dështuar të presidentit të saj nuk do të vihet në tryezë.
UEFA kishte kërcënuar me bojkot pasi propozimi i Infantinos për “Fifa Forward Enterprise” u zbulua dhe e përsëriti pasi u tërhoq, duke thënë se kushti që “përpjekje të tilla për të shpërfytyruar lojën në këtë mënyrë nuk do të bëhen më kurrë” nuk ishte përmbushur.
Pavarësisht përplasjeve në publik, UEFA dhe FIFA thuhet se kanë zhvilluar diskutime private mbi kushtet e heqjes së kërcënimit të bojkotit për disa javë, me organin drejtues evropian që më në fund mori siguritë e nevojshme.
Kur FIFA konfirmoi vendimin e saj për të braktisur projektin katër ditë pasi u bë publik, ajo harroi të premtonte se një plan i ngjashëm privatizimi nuk do të përsëritej, por tani e ka bërë këtë në korrespondencë private.
Ndërsa bojkoti ende nuk është hequr publikisht, është ndër temat që mund të lindin në një takim të komitetit ekzekutiv të UEFA-s dhe krerëve të federatave në Monte Karlo të enjten. 55 krerët e shoqatave anëtare të UEFA-s do të mblidhen para shortit të Ligës së Kampionëve gjatë asaj që tradicionalisht është një ditë e rëndësishme në kalendarin evropian të futbollit.
Qëndrimi i UEFA-s se Infantino duhet të largohet nuk ka ndryshuar dhe hapat e mëtejshëm në lidhje me qëndrimin e saj ndaj udhëheqjes së FIFA-s do të diskutohen gjithashtu në takimin e së enjtes.
