Përplasja mes UEFA-s dhe FIFA-s ka hyrë në një fazë të re dhe shumë më të ashpër.
UEFA ka kërcënuar me nisjen e procedimeve penale ndaj presidentit të FIFA-s, Gianni Infantino, lidhur me një plan tashmë të braktisur për shitjen e një pjese të të drejtave në turnetë e FIFA-s.
Sipas dokumenteve ligjore të siguruara nga The Sun, drejtuesit e futbollit europian kanë depozituar një dosje prej 60 faqesh në një gjykatë federale amerikane, ku Infantino është vendosur në qendër të akuzave dhe pretendimeve të UEFA-s.
Çështja lidhet me planin e Infantino-s për të shitur një 20 për qind të aksioneve në turnetë e FIFA-s, në një marrëveshje që do të kapte vlerën e rreth 3.1 miliardë paundëve.
Në dokumentet e dorëzuara në Gjykatën Federale të Distriktit Jugor të Floridës, UEFA argumenton se vlerësimi i propozuar për shitjen ishte “absurdisht i ulët”.
Sipas pretendimeve të UEFA-s, kjo vlerë nuk ishte përcaktuar përmes një ankandi të hapur dhe konkurrues dhe as nuk ishte testuar nga një vlerësues i pavarur.
Gjykata në Miami ka juridiksion mbi bazën e FIFA-s në Coral Gables, Florida, duke e bërë këtë çështje veçanërisht të rëndësishme në përplasjen mes dy institucioneve më të fuqishme të futbollit botëror.
Në atë që konsiderohet si një nga lëvizjet më agresive të UEFA-s ndaj FIFA-s, organizata europiane thuhet se po shqyrton mundësinë e përdorimit të ligjit penal zviceran kundër Infantinos dhe zyrtarëve të tjerë të FIFA-s.
Dokumentet përmendin mundësinë e nisjes së procedimeve për “keqmenaxhim kriminal”, një vepër që, sipas pretendimeve të raportuara, mund të sjellë deri në tre vjet burgim.
UEFA e përshkruan situatën si një çështje që mund të prekë drejtpërdrejt Infantinon, ndërsa në dokumente përdoren edhe terma të ashpër ndaj presidentit të FIFA-s dhe bashkëpunëtorëve të tij.
Infantino e kishte prezantuar planin përmes projektit “FIFA Forward Enterprises”, me synimin për t’u ofruar 211 federatave anëtare të FIFA-s një pagesë prej rreth 30 milionë paundësh për katër vite.
Megjithatë, federatat kishin vetëm disa javë për të vendosur nëse do t’i bashkoheshin marrëveshjes.
Pas një reagimi të fortë dhe kritikave nga aktorë të ndryshëm të futbollit ndërkombëtar, plani u tërhoq.
UEFA pretendon se pagesa e propozuar mund të ishte përdorur si një “nxitje” për federatat që të pranonin skemën e kundërshtuar.
Përplasja vjen në një moment delikat për Infantino-n, ndërsa UEFA thuhet se synon ta rrisë presionin ndaj tij përpara zgjedhjeve të ardhshme për presidencën e FIFA-s.
Në vend që të fokusohet vetëm te gara për rizgjedhjen e tij, UEFA po përdor tashmë edhe rrugët ligjore për të sfiduar drejtimin dhe vendimmarrjen e presidentit të FIFA-s.
