Ministrja e Arsimit, Lindita Nikolla, ka firmosur një udhëzim të ri, për mënyrën si do përcaktohet nota përfundimtare në arsimin e mesëm (gjimnazet). Në këtë udhëzim nenvizohet se mësuesit duhet të vendosin nota duke u bazuar te disa kritere të reja, ndërkohë që ndryshon tërësisht formula si do vendoset nota përfundimtare.
“Qëllimi kryesor i vlerësimit është gjykimi mbi arritjet e nxënësit referuar filozofisë dhe përmbajtjes së kurrikulës bazuar në kompetenca, si dhe të mbështesë të nxënit dhe përparimin e nxënësit. Ky qëllim përmbushet nga kombinimi i vlerësimit për të nxënë dhe i vlerësimit të të nxënit, bazuar në kornizën e vlerësimit të nxënësit në arsimin parauniversitar”, – thuhet në udhëzimin nr.14 të Ministrisë së Arsimit. Vlerësimi për nxënësit kryhet nëpërmjet vlerësimit të vazhduar (sipas shënimeve në evidencat e mësuesit), vlerësimit me test/detyrë përmbledhëse dhe vlerësimit të portofolit lëndor të nxënësit.
Vlerësimi i vazhduar
Vlerësimi i vazhduar bazohet në vëzhgimet dhe gjykimet e mësuesit mbi përgjigjet me gojë ose me shkrim, punët në grup, diskutimet e mësuesit me nxënësit, vetëvlerësimin e nxënësit, vlerësimin e nxënësit nga nxënësi, pjesëmarrjen në aktivitete dhe debatet në klasë, vlerësimin e detyrave të shtëpisë apo të klasës etj.
Vlerësimi me test/detyrë përmbledhëse
Vlerësimi me test/detyrë përmbledhëse ka për qëllim të matë nivelin e arritjeve të nxënësit për një grup të caktuar rezultatesh të nxëni, në përfundim të tremujorit. Ky vlerësim e orienton mësuesin për të përmirësuar mësimdhënien dhe procesin e të nxënit.
Vlerësimi me portofol lëndor
Vlerësimi i nxënësit bazuar në portofol lëndor, bëhet në përfundim të çdo tremujori dhe ka për qëllim vlerësimin e nxënësit në një kontekst të gjerë, duke përfshirë dokumentimin e kontributeve dhe arritjeve të tij për lëndën, për kompetencat kyçe, për punën individuale dhe në grup, krijimtarinë, talentin, si dhe për aspekte të gjykimit dhe reflektimit të nxënësit për veten dhe të tjerët.
Vlerësimi periodik
Vlerësimi periodik tremujor jepet nëpërmjet 3 notave të veçanta, për: – vlerësimin e vazhdueshëm me notë, që bazohet në shënimet e mësuesit të mbajtura në evidencat për periudhën tremujore, duke gjykuar në mënyrë progresive.
Vlerësimi përfundimtar
Vlerësimi përfundimtar kryhet në përfundim të vitit shkollor me notë dhe përshkrim referuar niveleve të arritjes.
Nota
Hapat për njehsimin e notës përfundimtare vjetore, janë: përcaktohet nota vjetore e vlerësimit të vazhdueshëm (NVV), bazuar në tri notat tremujore, duke gjykuar në mënyrë progressive. /r.a
