Ish ministri i Brendshëm, njëherësh ish kreu i Komisionit të Posaçëm për Reformën në Drejtësi, Fatmir Xhafaj është shprehur se dita e sotme dhe e nesërme është vendimtare.
Sipas tij, me ngritjen e KLP dhe KLGJ bëhet hapi i parë themelor për ngritjen e sistemit të ri të drejtësisë.
Xhafaj nënvizon se reforma në drejtësi nuk mund të ndalet askush, ajo është jetike për luftën kundër krimit, korrupsionit dhe pandëshkueshmërisë.
Postimi i Xhafajt në Twitter:
SOT e NESËR hapa kyç për reformën në drejtësi. Mbledhjet e prokurorëve dhe gjyqtarëve do të zgjedhin anëtarët e KLP dhe KLGJ. Nëse Vettingu i gjyqtarëve e prokurorëve synon mbylljen e një kapitulli të errët, krijimi i KLGJ dhe KLP është hapi i parë e themelor për ngritjen e sitemit të ri.
Gjyqtarët e prokurorët me transparencë e përgjegjësi qytetare, zotësi profesionale e vlera morale do të jenë kontribues të procesit, pa mëdyshje. Është përgjegjësi për konsolidimin e shtetit të së drejtës, interesin e qytetarëve, ngritja sa më shpejt e funksionimi i KLGJ dhe KLP.
Shumë shpejt KLGJ dhe KLP do të ngrihen për t’i dhënë udhë procesit reformues të institucioneve, për t’u dhënë atyre pavarësinë, përgjegjshmërinë, funksionalitetin dhe eficensën e munguar.
Reforma në drejtësi nuk mund të ndalet më nga askush. Ajo është jetike për të ardhmen e vendit, për demokracinë e shtetin e së drejtës, luftën kundër krimit të organizuar, korrupsionit e pandëshkueshmërisë
a.çupaj
