Asambleja e Përgjithshme e OKB-së miratoi sot, si çdo vit që prej 1991-it, një rezolutë jo-detyruese duke i bërë thirrje SHBA-së për të hequr embargon ekonomike dhe financiare ndaj Kubës.
Uashingtoni, votoi kundër kësaj rezolute duke kërkuar progrese demokratike në ishullin komunist.
Rezoluta u miratua nga 191 shtete dhe vetëm dy votuan kundër, SHBA-ja dhe Izraeli.
Vitin e kaluar, Uashingtoni abstenoi për herë të parë në një njëçerek shekull, pas afrimit historik të arritur në vitin 2014 nga ish-presidenti demokrat Barack Obama me Havanën, duke përmirësuar marrëdhëniet diplomatike dhe zbutur embargon tregtare.
Duke e cilësur si “një lojë politike”, ambasadorja amerikane në OKB, Nikki Haley theksoi se “çdo vit, Asambleja e Përgjithshme e OKB po humbiste kohë duke shqyrtuar këtë rezolutë”.
“SHBA-ja nuk ka frikë nga izolimi, është kundër kësaj rezolute dhe do të vijojë të ketë këtë qëndrim për aq kohë sa popullit kuban do t’i privohet e drejta e tij”, shtoi ajo.
“Bllokada e Kubës është e regjistruar në ligjin amerikan dhe vetëm Kongresi amerikan ka kompetencë t’i japë fund”, saktësoi Nikki Haley.
Ajo kritikoi gjithashtu gjendjen e mjerueshme të ekonomisë kubane dhe shtypjen e popullit kuban, që duhet të ketë të drejtën e fjalës së lirë dhe për të zgjedhur zyrtarët e saj politikë./b.d
