“U zbulua strategjia e Scholz dhe Biden. Plan i ri sekret për Ukrainën”, me këtë titull e nis artikullin e saj, tabloidi gjerman BILD, ndërsa tregon se nga burime të brendshme të qeverisë gjermane i është thënë se Perëndimi po kërkon mbylljen e luftës në Kiev.
SHBA dhe Gjermania duan ta shtyjnë presidentin ukrainas Zelensky drejt bisedimeve me Rusinë, duke i ofruar Ukrainës vetëm armë të mjaftueshme për të mbajtur vijën aktuale të frontit, ka raportuar gazeta gjermane Bild, duke cituar burime në qeverinë gjermane
“Plani gjermano-amerikan është të furnizojë Kievin me armë të mjaftueshme që Ukraina të mbajë vijën aktuale të frontit, por jo të rimarrë territoret e pushtuara”, shkruan gazeta.
“Zelensky duhet të kuptojë se gjërat nuk mund të vazhdojnë kështu”, tha një nga burimet për gazetën. “Ai duhet t’i drejtohet kombit të tij dhe të shpjegojë se është e nevojshme të zhvillohen bisedime.”
SHBA dhe Gjermania duan që Zelensky të kuptojë se zgjerimi i konfliktit nuk ka kuptim për vendin e tij. Megjithatë, as kancelari Olaf Scholz dhe as presidenti i SHBA Joe Biden nuk planifikojnë të bëjnë kërkesa të drejtpërdrejta që ai të fillojë negociatat. Kujtojmë se SHBA dhe Gjermania janë furnizuesit më të mëdhenj të armëve për Kievin.
Bild shkroi se situata në fushën e betejës është “e zymtë” për Ukrainën dhe se “trupat ruse po përparojnë, megjithëse ngadalë”. Sipas gazetës, qëllimi kryesor i qeverisë gjermane tani është të ndihmojë zyrtarët në Kiev të arrijnë një “pozicion negociues të favorshëm”. “Shtëpia e Bardhë dhe zyra e kancelarit gjerman po koordinojnë veprimet e tyre në këtë çështje”, thanë burimet.
Gazeta raportoi se shumë vendime gjermane për dërgesat e armëve tani merren nga zyra e Scholz, jo nga Ministria e Mbrojtjes e drejtuar nga Boris Pistorius. Sipas Bild, Pistorius është gati të dërgojë raketat Taurus në Ukrainë, por “duart e tij janë të lidhura”./m.j
