Grida Duma u shpall si “Gruaja e vitit” pak ditë më parë, nga “Koalicioni për Gratë dhe të Rinjtë në Politikë”.
Ajo ka komentuar emicionet e të qenit gruaja më e pëlqyer, duke folur në një intervistë për Shekullin.
Zonja Duma, dy ditë më parë “Koalicioni për Gratë dhe të Rinjtë në Politikë” në bashkëpunim me Shtëpia e të Drejtave të Njeriut/CRCA, që është mbështetur nga “Olof Palme International Center” ju kanë dhënë çmimin “Gruaja e vitit 2015 në politikë”. Cila ishte ndjesia që morët në momentin e parë kur u njoftuat se jeni shpallur fituese e këtij çmimi?
Ju them se ishte krejtësisht surprizë për mua ky vlerësim, sigurisht që është një nga surprizat më të mira. Është një situtatë e veçantë, pasi organizatorët më janë drejtuar në fillim nëpërmjet një emaili njoftues, ku më bënin me dije që publiku më kish zgjedhur ndër figurat gra të parapëlqyera dhe kontakti tjetër me organizatorët ishte momenti kur sërish më njoftuan me anë të email-it për përfundimin e votimeve. Një sjellje veçanërisht korrekte për mënyrën se si jemi mesuar në të përditshmen tonë shqiptare, ku zakonisht duhet të njihesh drejtëpërsëdrejti me personat organizatorë. Duhet të theksoj që kjo mënyrë kaq perëndimore e sjelljes më ka surprizuar, po aq sa vlerësimi i marrë.
Në vitin për të cilin ju është dhënë çmimi, ju keni kaluar një përvojë jo të thjeshtë dhe e kam fjalën për kandidimin nën siglën e PD-së për kreun e bashkisë së Durrësit. A ishte kjo një nga ngjarjet që ju ka promovuar dhe i ka shërbyer qytetarëve për t’ju njohur më mirre?
Është dhe do të mbetet një përvojë e pazëvendësueshme. Kam qartësinë që qytetarët durrsakë më votuan dhe kërkuan ndryshimin. Të gjithë që kemi prekur zgjedhjet zgjedhjet në Durrës, qoftë në pozitat e kandidatit apo edhe të një qytetari të vëmendshëm, e dimë që rezultati i vërtetë do të kish qenë i ndryshëm nga aktuali. Pavarësisht kësaj, çdo fakt duhet pranuar ashtu siç është dhe me pjesën e tij të errët. Ajo çka nuk mund të mohohet së është fituar nga fushata dhe gara e Durrësit, është krijimi i një modeli fushate me standard dhe integritet. Ajo fushatë është vlerësuar dhe memorizuar si një fushatë me vlera qytetarie, integriteti dhe komunikimi të vërtetë.
Nga humbja në zgjedhje lokalet, për disa muaj jeni tërhequr nga impenjimi aktiv në parti, por së fundi jeni rikthyer në selinë blu, madje jeni një nga protagonistet më të shpeshta në deklaratat për shtyp të PDsë. Cili do të jetë roli juaj në këtë vit në PD?
Nuk jam tërhequr asnjë moment të vetëm nga impenjimi aktiv në parti. Frekuenca jo e shpeshtë në media mund të jetë perceptuar si një pauzë me publikun, por edhe kjo mendoj se vjen si pasojë e faktit që jam shumë aktive në media zakonisht. Aktualisht mbaj detyrën e Sekretares për Marrëdhëniet me publikun, përpiqem të bëj maksimumin, por ajo çka synoj të mund të bëj më shume është që përpos angazhimeve të përditshme, koha të më lejojë të shkoj në qytete apo periferi në mbarë vendin, në dëgjesë konkrete të drejtëpërdrejtë të qytetarëve.
