U shkallmua një godinë e kalbur, por kalbësira mbeti

Nga Ilir Yzeiri

Personalisht jam prej atyre që nuk kam qenë tërësisht entuziast për SPAK. E kam çmuar shkallmimin e Godinës së vjetër të Drejtësisë së kalbur që instaloi Berisha pas vitit ’90, por kam qenë skeptik për Drejtësinë e Re që disa herë simbolizohej me Dumanin. Me këtë që ndodhi më Erion Veliajn, jam i bindur se SPAK ia arriti që nga Struktura e Posaçme që do të hetonte Korrupsionin të kthehej në një çetë hakmarrëse dhe guerrilase kundër atyre që e mbështetën dhe e realizuan këtë strukturë të posaçme dhe që pranuan me përulësi që Shqipëria të trajtohej si një vend në gjendje të jashtëzakonshme SPAK iu mbivendos Prokurorisë së Përgjithshme dhe GJKKO-ja iu mbivendos po ashtu Gjykatës ekzituese.

Qeveria socialiste dhe Edi Rama u treguan jo vetëm naivë, por edhe jo të aftë si burra shteti. Ia besuan me naivitet gjithë këtë proces reformimi disa strukturave anonime dhe Ministrinë e Drejtësisë personave pa dinjitet e personalitet politik, moral e profesional. Kam qenë dhe jam i bindur se në SPAK u mblodh gjithë vreri dhe urrejtja kundër qeverisë socialiste dhe Edi Ramës e gjithë atyre njerëzve që u goditën nga reforma në drejtësi. SPAK e nisi punën e tij më gjuetinë e shtrigave ndaj të zgjedhurve socialistë dhe i hipnotizoi shqiptarët me arrestime si në kohën e juntave ushtarake. Edhe ajo që ndodhi me Ilir Metën dhe mënyra se si e ndaluan dhe e morën atë është e turpshme dhe mund ta bëjnë vetëm juntat e Amerikës së Jugut.

SPAK dhe Altin Dumani e kanë orientuar punën e tyre tek zhbërja e arritjeve të socialistëve dhe te goditja e imazhit të tyre. E kanë kthyer në një skenë cirku dhe në një paradë të frikshme si të juntave thirrjen në SPAK. Çdo mëngjes në SPAK do të paraqitet një nëpunës apo zyrtar socialist për të krujuar perceptimin se socilaistët janë të korruptuar dhe lajmet te ne hapen me këtë maskaradë të SPAK-ut. Ju kujtohet kryetari i Bashkisë së Fushë Arrësit që kishte bërë një rrugë me shpenzimet e komunitetit, por SPAK e procedoi. Për të mos folur për arkën e peshkut, për kryetarin e Bashkisë së Devollit që doli i pafajshëm apo për tre drejtorë ujësjellsash që dolën edhe ata të pafajshëm.

Më thoni një çështje që ka nisur të hetojë SPAK dhe është përfunduar. Edhe për inceneratorët e famshëm, ende nuk ka mbaruar hetimi e gjykimi, sepse SPAK ka qëllim jo të hetojë por të diskreditojë qeverisjen e PS-së. Edhe në rastin e ish-kryeministrit Ahmetaj. Unë kam shkruar edhe në atë kohë se ndaj tij po ushtrohej dhunë si në kohën e Enver Hoxhës dhe se hetimi familjar i kalonte të gjitha kufijtë. Nuk kishte dhe nuk ka asnjë provë ndaj Ahmetajt, kishte dhe ka vetëm linçim publik për të krijuar perceptimin në publik se socialistët vjedhin. Qëndrimi i Edi Ramës ndaj Ahmetajt ka qenë thellësisht i gabuar. Ai nuk duhet ta lindte atë në gojën e SPAK e t’ia çonte në prehër Berishës. Dhe ja tani se çfarë ndodh me Erion Veliajn. Një denoncim anonim me insinuata dhe pa fakte dhe një arrestim skandaloz. Ndërkaq, këtë radhë nuk po flas për Sali Berishën, 21 janarin, Gërdecin apo për masakrat që i janë bërë këtij vendi dhe për sjelljen e SPAK ndaj tyre. Si përfundim, Edi Rama dhe socialistët nuk duhet të kompleksohen më as nga SHBA-të dhe as nga Europa.

Ndërtimi i SPAK ishte një sipërmarrje që çoi në krijimin e një strukture në të cilën u mblodh gjithë urrejtja e atyre që sistemi i nxori jashtë dhe të cilët me njerëzit e tyre brenda kanë vetëm një qëllim- të zhbëjnë Partinë Socialsite dhe të krijojnë tensione sociale në vend. Qeveria socialiste duhet të luftojë fort që t’i fitojë thellë këto zgjedhje dhe pas tyre të mendojë që reforma në drejtësi nuk është kryer dhe që SPAK duhet të pushojë së ekzistuari në këtë formë. Po ashtu, Shqipëria ka nevojë për një ligj që të tregojë se ky vend i ka pushtetet e balancuara dhe se asnjë pushtet nuk mund të kërcënojë tjetrin. Autoriteti që i është dhënë SPAK-ut për të shkatërruar demokracinë shqiptare duhet parë si një vepër kriminale dhe se prokurorët e SPAK nuk duhet të jenë mbi ligjin dhe se edhe ndaj tyre, kur ata abuzojnë duhet të veprojë ligji.