Dy persona janë arrestuar në lidhje me ngjarjen e rëndë që ndodhi pasditen e djeshme në Durrës, ku një punonjës 35-vjeçar humbi jetën, pasi u rrëzua nga koshi i vinçit teksa punonte për prerjen e degëve të pemëve në lagjen nr. 13.
Lala, 35-vjeçari që humbi jetën këtë të premte në Durrës ishte punonjës në një kompani private dhe ka gjetur vdekjen, pasi ka rënë nga vinçi, teksa ishte duke prerë pemët në lagjen nr.13.
Kompania në të cilën ai punonte po kryente punime për ndërtimin e pedonales në plazhin e Durrësit.
Njoftimi i policisë:
Në lidhje me informacionin paraprak të ditës së djeshme, për një shtetas që humbi jetën duke punuar, ju bejmë me dije se:
Specialistët për Hetimin e Krimeve të Stacionit të Policisë Plazh, në vijim të veprimeve hetimore të kryera në drejtimin e Prokurorisë, për këtë ngjarje të ndodhur në lagjen nr.13, ku humbi jetën punonjësi i një firme që kryen punime për ndërtimet e pedonales në këtë zonë, i cili po priste degët e palmëve, pa lejen e organeve kompetente, arrestuan në flagrancë për veprën penale “Shkelja e rregullave të mbrojtjes në punë”, shtetasit:
E. M., 33 vjeç, banues në Tiranë, me detyrë drejtues teknik i firmës;
B. M., 42 vjeç, banues në Durrës, drejtues i vinçit nga i cili ra shtetasi A. L., 35 vjeç, banues në Tiranë, i cili për pasojë humbi jetën.
Materialet i kaluan Prokurorisë Durrës, për veprime të mëtejshme.
/f.s
