Deputetja e PD-së, Albana Vokshi ka akuzuar qeverinë se ka keqpërdorur fondet për pandeminë e COVID. Me një postim në Facebook, teksa citon të dhënat e studimit të kryer nga “Together for Life” për monitorimin e buxhetit të pandemisë, Vokshi thotë se vetëm 4% e të sëmurëve janë rimbursuar.
Sipas Vokshi, buxheti i shëndetësisë nuk u përdor për të ndihmuar shqiptarët, por për të “pasuruar akoma më shumë klientët e Edi Ramës”.
Sipas Vokshit gjatë pandemisë u dhanë tendera ‘sekretë’ që blenë mjete mbrojtëse me 3-4 fishin e çmimeve të tregut me pakicë, ndërsa thekson se do të kërkojë transparencë të plotë për fondet e pandemisë në Komisionin Parlamentar të Shëndetësisë.
“Tenderat sekretë blenë mjete mbrojtëse me 3-4 fishin e çmimeve të tregut me pakicë, por shërbimi për pacientët nuk u përmirësua, mjekët dhe stafi në qendrat shëndetësore patën trajtim qesharak, duke marrë vetëm 2 kuti me maska mbrojtëse në 18 muaj e për mjete të tjera mbrojtëse. Kush përfitoi nga tenderat sekretë dhe josekretë gjatë pandemisë? Kush mban përgjegjësi për nivelin më të lartë të vdekshmërisë në rajon? Kjo është një çështje që nuk do ta kalojmë në heshtje! Qytetarët meritojnë respekt dhe llogaridhënie! Në Komisionin Parlamentar të Shëndetësisë do të kërkojmë transparencë të plotë për fondet e pandemisë”, thekson Vokshi.
/b.h
