Kjo është koha kur pas plazhit e shohim lëkurën tonë rozë edhe pse nuk kemi qëndruar shumë në diell, lëkura jonë duket e dëmtuar. E pamundur të mos digjemi e sidomos në vendin tonë, ku temperaturat u rritën menjëherë dhe ku nxehtësia e diellit duket se është e gatshme të lërë shenjat në lëkurën tashmë të zbardhur që prej dimrit që lamë pas.
Disa gjëra që duhet të bëni në rast se jeni djegur nga dielli janë që të pini sa më shumë ujë dhe të hani fruta që përmbajnë betakarotenë; në pjesët e djegura kaloni një garzë të lagur me ujë të ftohtë; bëni dush të ftohtë dhe aplikoni krem për pas diellit.
Ndër zgjidhjet natyrale për pas djegies nga plazhi, janë domatet, patatet, bananet dhe kastraveci, të cilat janë shumë të mira për të qetësuar djegiet. Pritini në feta dhe kalojini në mënyrë delikate në pjesën e djegur. Një tjetër zgjidhje shumë e mirë është duke grirë në mikser ose rende pak kastravec dhe duke e përzier me kos. Kjo maskë është freskuese për trupin dhe qetëson pjesën e djegur të tij.
Ndërsa disa gjëra që nuk duhet ti bëni kategorikisht nëse jeni djegur nga dielli është që të mos ekspozoheni sërish në diell, pasi në këtë mënyrë e acaroni më tej lëkurën. Nuk duhet as të hiqni cipat e lëkurës dhe as ta krruani atë. Madje nuk këshillohet që të pini as ujë të ngrirë.
