Zbardhen të tjera detaje nga plagosja e dyfishtë në Tapizë të Fushë-Krujës gjatë orëve të vona të natës. Sipas burimeve policore, mësohet se në tavolinën e lokalit ku ndodhi krimi ishin 6 shokë, të cilët ishin mbledhur për të festuar ditëlindjen e njërit prej tyre. Dhe për ironi të fatit, ditëlindjen e kishte pikërisht personi që mbeti i plagosur.
Ai është Lorenc Cani 25 vjeç. Ky i fundit u qëllua me armë nga shoku i tij Xhentil Sefa 25 vjeç, pas një debati që nisi mes tyre për shkaqe banale. Dyshohet se ata kanë qenë edhe nën efektin e alkoolit.
Lorenc Cani u qëllua me armë në shpatull, ndërsa autori Xhentil Sefa u vetëplagos me armë në dorë. Të dy u dërguan në spital dhe ndodhen jashtë rrezikut për jetën.
Dy prej shokëve kallëzuan ngjarjen në polici dhe pasi iu mor dëshmia u lanë të lirë. Ndërsa dy të tjerë, Flogert Kallari dhe Hygert Muja u arrestuan. I pari sepse nuk kallëzoi krimin. Ndërsa i dyti, i cili është pronari i lokalit ku ndodhi ngjarja, ka fshehur armën e krimit, ka hequr gëzhojat nga vendngjarja dhe ka prishur vendin e ngjarjes. Ai akuzohet për veprime që pengojnë zbulimin e së vërtetës.
/s.f
